Mamma Dharifulhu Naa Na Naa 12

އަހަރެން މާލެ އައިއިރު ސްކޫލްތަކުގެ ބޮޑުބަންދު ޗުއްޓީ ފެށުނީއެވެ. ރަށު ސްކޫލުގެ ގްރޭޑް ހަތެއް ނިންމާފައި މާލެ އައުމުގެ ސަބަބުން، ވަރަށް ފަސޭހަކަމާއެކު އެމް.އީ.އެސްގެ ގްރޭޑް އަށަކުން އަހަރެންނަށް ޖާގަ ލިބުނެވެ. ސްކޫލަށް ވެއްދުމުގެ ހުރިހައި ޒިންމާއެއް އުފުލުމަށްފަހު، މޫސަބޭ އަހަރެންނަށް ބާޒާރު ކުރާށާއި މާރުކޭޓަށްގޮސް މަސް ގަންނަން ދަސްކޮށްދިނެވެ. ކުރިން މާލޭގައި އުޅުނު ނަމަވެސް އަހަރެންނަށް މާލޭގައި ތަންތަނަށް ގޮސް ހަދާކަށް ނޭންގެއެވެ.

މޫސަބޭގެ ހަތަރު ދަރީންނާއި އަންބަކު ހުރެއެވެ. އެ ހަތަރު ދަރީން ތެރެއިން ދޮއްޓަށް ތިބޭ ދެ އަންހެން ދަރީންނާއި ފިރިހެން ދަރިފުޅު އުޅެނީ މީހުނާ އިނދެގެނެވެ. ހަގަށް ހުންނަ އަންހެން ކުއްޖާ ފެށޭއަހަރު ބަދަލުވާނީ އަމީނިއްޔާގެ ގްރޭޑް ނުވައަކަށެވެ. އެއީ ޝަޒިޔާއެވެ. ހަތަރު ދަރީންތެރެއިން މޫސަބޭ އެންމެ ލޯބިވާ ދަރިފުޅެވެ. އެއާއިލާގެ އެންމެންވެސް ޝާޒިޔާދެކެ ވަރަށް ލޯބިވެއެވެ. އެމީހުން ވާ ލޯބީގެ ހެކި ޝާޒިޔާގެ ގައިގާ ޖަހާފައިވާ ލޮކި މަސްތަކުން ހާމަވާހައިވެއެވެ.

އަހަރެން އެގެއަށް ދިޔަ ދުވަހުން ފެށިގެން ޝާޒިޔާ އަހަރެންނަށް ވަރަށް ބަލާކަން ފާހަގަ ކުރެވުނެވެ. އޭއްޗެކޭމީއްޗެކޭ ކިޔައިގެން އަހަރެންނާ ވާހަކަ ދައްކަން މަސައްކަތް ކުރެއެވެ. އުމުރުން ސާދަ އަހަރު ފުރިފައި ވުމާއެކު އަހަރެންނަށްވެސް މިވަނީ ކީއްކަން އެނގޭހައި ވިއެވެ. އެކަމަކު އަހަރެން ޝާޒިޔާއާއި އެއްގޮތަކަށްވެސް ގަޔާއެއް ނުވެއެވެ. ވެއްޓިއްޖެއްޔާ ނަގާބަހައްޓާނެ ކޮޅެއްވެސް ނޭންގޭހައި ފަލަވީމައެވެ. ތަށިބަރިއެއްހެން ގައިގެ ވަށައިގެން މަސްޖަހާފައި ހުންނައިރުވެސް ގަޔަށްބާރު ހެދުން ލާފައި ހުންނާތީއެވެ. އުމުރަށްވުރެ ޅަވެގެން، ތުއިވެ ތުއިވެފައި ވާހަކަ ދައްކާތީއެވެ. ތުއްތު ކުއްޖެއްހެން މޫސަބޭގެ އުނގަށް އެރި އުޅޭތީއެވެ. އެހެން އުޅެނިކޮށް މޫސަބޭގެ ސަރަންފީ ގޮނޑި ބިންދައިގެން ދެމީހުން ސިޓިންގރޫމް ތެރެއަށް ވެއްޓުނު ދުވަހު އަހަރެން ކައިރިއަށް ނުލަފާ ހިންޏެއް އައެވެ. އެކަމަކު ހިނިގަނޑު އޮއްބާލާފައި ގޮސް ދެމީހުން ނެގޭތޯ ބެލީމެވެ. އެކަމަކު އަހަރެންނަކަށް ޝާޒިޔާއެއް ނުނެގުނެވެ. އޭނާ ނެގުނީ މޫސަބޭގެ އެންމެ ދޮށީ އަންހެން ދަރިފުޅު ނާހިދާގެ ފިރިމީހާ، އަހުމްދުގެ އެހީއާއިވެސް އެކުގައެވެ.

އަހަރެން މޫސަބޭއާއިއެކު ފަސްވަގުތު ނަމާދަށް ދަމެވެ. މިސްކިތަށްދާން ނުކުންނަ ކޮންމެ ފަހަރަކު އަހަރެން ދޮންބެ މަތިން ހަނދާންވެއެވެ. މިސްކިތުން ދޮންބެއާއި ދިމާވާނެ ނަމައޭ ހިތަށް އަރައެވެ. އެކަމަކު ގަލޮޅުގައި ހުންނަ މިސްކިތަކަށް ދޮންބެ ނަމާދަށް ނާންނާނެކަން އަހަރެންނަށް އެނގެއެވެ.

އެއްދުވަހަކު މޫސަބޭއާއިއެކު މާރުކޭޓަށް މަސް ގަންނަށް ގޮސް އުޅެނިކޮށް އަހަރެންނަށް މާރުކޭޓުތެރެއިން ބައްޕަ ފެނުނެވެ. މީހަކު އަހަރެންނާ ދިމާއަށް ބަލާހެން ހީވެގެން އަހަރެން ބަލާލިއިރު އަހަރެންގެ ކުރިމަތިން ދިހަވަރަކަށް ފޫޓު ދުރުގައި ބައްޕަ ހުއްޓެވެ. އެކަމަކު ބައްޕަ ހުރީ އަހަރެންނަށް ބަލަހައްޓައިގެނެއް ނޫނެވެ. އަހަރެން ބައްޕައާއި ދިމާއަށް ވަރަށް ބެލީމެވެ. ނަމަވެސް ބައްޕައަކަށް އަހަރެން ފެނުނުހެނެއް ހިއެއް ނުވެއެވެ. އަހަރެމެން މަސްގަނެގެން މާރުކޭޓުން ނުކުތްއިރުވެސް ބައްޕަ މާރުކޭޓް ތެރޭގައި ހުއްޓެވެ. މޫސަބޭގެ ސައިކަލު ފަހަތަށް އެރުމަށްފަހުވެސް އަހަރެން މާރުކޭޓް ތެރެއިން ބައްޕަ ފެނޭތޯ ބަލާލީމެވެ.

އެރޭ އަހަރެންގެ މާޒީގެ މަތިން ވަރަށް ހަނދާންވިއެވެ. އެންމެ ބޮޑަށް ހަނދާންވީ ޝަހޫދައްތަގެ މަތިންނެވެ. ޝަހޫދައްތަ ކޮބައިބާއެވެ؟ ރަށުގައި އަހަރެން ހޭދަކުރި ދެއަހަރު ދުވަހުގެތެރޭ ޝަހޫދައްތަ އެންމެ ފަހަރަކުވެސް އަހަރެންނަށް ގުޅާނުލީ ކީއްވެބާއެވެ؟ ޝަހޫދައްތަ އަހަރެންމަތިން ހަނދާން ނައްތާލީ ހެއްޔެވެ؟

*******************

އާއަހަރުފެށި، ސަކޫލްތަކުގެ ކިޔެވުން ފެށިއްޖެއެވެ. އެކަމަކު އަހަރެންނަށް ސްކޫލަށްދާން ފެށޭވެރުވީ ދެހަފުތާވީ ފަހުންނެވެ. ފާނަބަސަންދު ޖެހިގެން ގޭގައި މަޑުކުރަން ޖެހުނީއެވެ. އަހަރެން ބަލިވުމުން މޫސަބޭއާއި މޫސަބޭގެ އަންހެނުން އުފަން ދަރިއެއް ފަދައިން އަހަރެންނަށް އަޅާލިއެވެ. އަހަރެންނަށް އެކަނި ސްކޫލަށް އައިސް ގޮސް ހަދަން ދަސްކޮށް ދިނުމަށްޓަކައި މޫސްބޭ ހަފުތާއެއް ވަންދެން އަހަރެން ގޮވައިގެން ސްކޫލު ދޮށަށް ހިނގިއެވެ. ފުރަތަމަ ކްލާހަށް ދިޔައިރު އަހަރެން ހުރީ ކޮންމެވެސް ވަރަކަށް ބިރުގެންފައެވެ. ކުލާސް ދޮރުމައްޗަށް އެރުމާއެކު އަހަރެންގެ ހިތް ބާރުބާރަށް ތެޅެންފެށިއެވެ. ކުލާހުގެ ހުރިހައި ކުދިން ތިބީ އަހަރެންނާ ދިމާއަށް ބަލަހައްޓައިގެނެވެ. އޭގެތެރޭގައި ދަންނަ އެންމެ މޫނެއްވެސް ނެތެވެ. ބޯޑުގައި އެއްޗެއް ލިޔަން ޓީޗަރު ހުއްޓެވެ.

'ސަރ! އާކުއްޖެއް!' އަހަރެން އައިސް ދޮރުމައްޗަށް ހުއްޓުމުން ކުއްޖަކު ބުނިއަޑު އިވުނެވެ.

ޓީޗަރު އަހަންނަށް ބަލާލިއެވެ. 'އާދޭ!' އަހަރެންނަށް އަތުން އިޝާރާތް ކޮށްލަމުން ޓީޗަރު ބުންޏެވެ.

އަހަރެން މަޑުމަޑުން ކުލާސްތެރެއަށް ވަނީމެވެ.

'އިށީންދޭ!' އެންމެ ކުރީބަރީގައި ހުސްކޮށްހުރި ގޮނޑިއަކަށް އިޝާރާތްކޮށްލަމުން ޓީޗަރު ބުންޏެވެ.

އަހަރެން ޑެސްކް މަތީ ދަބަސް ބޭއްވުމަށްފަހު ގޮނޑީގައި އިށީންނީމެވެ.

'ޓައިމްޓޭބަލާ ހުރިހައި އެއްޗެއް ހަމަޔަށް އެބަހުރިތަ؟' ޓީޗަރ އަހާލިއެވެ.

'ލައްބަ!'

އިރުކޮޅެއް ވަންދެން އަހަރެންގެ މޫނަށް ބަލަހައްޓައިގެން ޓީޗަރު ހުއްޓެވެ. އެއަށްފަހު ކުލާހުގެ ހުރިހައި ކުދިންނާ ވާހަކަ ދައްކަން ފެށިއެވެ. 'މިއަދު ކުލާހަށް އިތުރު ކުއްޖަކު އައީމަ ސަރ ބޭނުން ހުރިހައި ކުދިން އަލުން ތަޢާރަފް ވެލަން. ކޮބާ މިކޮޅުން ފަށާ!' ކުލާހުގެ އެންމެ ކުރިން ކަނާތްފަރާތު ކަނުގައި އިން ކުއްޖާއަށް އިޝާރާތް ކޮށްލަމުން ސަރ ބުންޏެވެ.

ފަހަރަކު ކުއްޖަކު ތަޢާރަފުވާން ފެށިއެވެ. އެކަމަކު އަހަރެން އެއިން އެއްވެސް ކުއްޖެއްގެ ނަމެއް ހަނދާނެއް ނުހުންނާނެކަން ގައިމެވެ.

އެންމެން ތަޢާރަފުވަމުން އައިސް އަހަރެންނާ ހަމަވުމުން އަހަރެން ކޮޅަށް ތެދުވީމެވެ. އަދި ނަން ބުނެލީމެވެ.

'ކޮން ރަށެއް؟' ނަން ބުނުމަށްފަހު އިށީންނަން އުޅެނިކޮށް ސަރ އެހިއެވެ.

އަހަރެންނަކަށް ދޭނެ ޖަވާބެއް ނޭންގުނެވެ. ސަރއަށް ބަލަހައްޓައިގެން ހުރެވުނީއެވެ.

'މަންމަ ކޮންރަށެއް؟' އަހަރެންނަށް ޖަވާބުދޭން އުނދަގޫވި ސަބަބު ސަރއަށް ވިސްނުނު ކަހަލައެވެ.

'މާލެ.' އަހަރެން ޖަވާބު ދިނީމެވެ.

'ބައްޕަ؟'

'އަލިފު ރަސްދޫ.'

'އެހެންވީއިރު ފައުޒީ ކޮން ރަށެއް؟'

އަހަރެންނަށް ޔަޤީންކޮށް ބުނާކަށް ނޭންގުނެވެ. އުފަންދުވަހުގެ ސެޓްފިކެޓް ބަލާލާފަ އާދެވުނު ނަމައޭ ހިތަށް އެރިއެވެ.

'އައި.ޑީ ކާރޑްގަ އިންނަނީ ކޮން ރަށެއް؟'

'އަޅުގަނޑުގެ އައި.ޑީ ކާރޑެއް ނޯވޭ.' އަހަރެން ތުރުތުރު އަޅާ އަޑަކުން ބުނީމެވެ.

ކުލާސްތެރެއިން ކުއްޖަކު ހީނލިއަޑު އިވުނެވެ. ސަރ އެކުއްޖާއާއި ދިމާއަށް ހަރުކަށި ގޮތަކަށް ބަލާލިއެވެ.

'އެންމެ ރަނގަޅު... އިށީންދޭ.' އަހަންނަށް ބަލާލުމަށްފަހު ސަރ ބުނެލިއެވެ.

ކުލާހުގެ ހުރިހައިކުދިން ތަޢާރަފްވެ ނިމުމުން ސަރ ތަޢާރަފު ވެލިއެވެ.

'ސަރ އަށް ކިޔަނީ ޝަފީގު! ސަރ ކިޔަވައިދެނީ ދިވެހި.' އަދި އެއަށްފަހު ބޯޑާ ދިމާއަށް އެނބުރިލިއެވެ.

'އޭ ނިއުބޯއި!' އަހަރެންގެ ފުރަގަހުގަ އިން ކުއްޖާ މަޑުމަޑުން ގޮވާލުމުން އަހަރެން އެނބުރިލީމެވެ.

'އޭ ކާކު!' ސަރ ބުނިއަޑު އިވުމުން އަހަރެން އަވަސް އަވަހަށް އެނބުރިލީމެވެ. 'ކާކު ނިއުބޯއި އޭ ބުނީ!'

އެކަކުވެސް އަނގަޔަކުން ނުބުންޏެވެ.

'އޭނަޔަށް ކިޔަނީ ފައުޒީ! އެކަކުވެސް ނިއުބޯއި ކިޔައިގެން ނުވާނެ!'

'ލައްބަ ސަރ' ހުރިހައި ކުދިން އެއްފަހަރާ ބުންޏެވެ.

އެކަމަކު ދެހަފުތާއެއްހައި ދުވަސް ވަންދެން އަހަރެންނަށް 'ނިއުބޯއީ'ގެ ލަގަބު ލިބުނެވެ.

'ފައުޒީ!' އެދުވަހު ކްލާސްތައް ނިމިގެން އަހަރެން ސްކޫލުން ނުކުންނަން ދަނިކޮށް ޝަފީގު ސަރ ގޮވާލިއަޑު އިވުމުން އަހަރެން ބަލާލީމެވެ. 'އެކަނިތަ ގެއަށް ދަނީ؟'

'ނޫން! ބޭބެއާއި އެކު.' އަހަރެން ބުނީމެވެ.

'ސަރ ބޭނުން ފައުޒީގެ ބޭބެއާއި ބައްދަލުކޮށްލަން.'

އަހަރެމެން ސްކޫލުން ނުކުތްއިރު ދޮރު ކައިރީ މޫސަބޭ ހުއްޓެވެ. އަހަރެން ސަރ މޫސަބޭއާއި ބައްދަލުކޮށް ދިނީމެވެ. ޝަފީގުސަރ މޫސަބޭކައިރީ ދެއްކީ އަހަރެންގެ އައި.ޑީ ކާރޑްގެ ވާހަކައެވެ. އަދި އަހަރެން ރަޖިސްޓްރީ ކޮށްފައިވަނީ ކޮން ރަށެއްގައިތޯ އެހިއެވެ.

'މާލޭގަ.' މޫސަބޭ ބުންޏެވެ.

އަމިއްލަ ރަށަކީ ކޮބައިކަން އެނގުމުން އަހަރެން ހަމަޖެހުމުގެ ނޭވާއެއް ލީމެވެ.

އެންމެ ފުރަތަމަ އެކަނިން ސްކޫލަށް ދިޔަދުވަހު އަހަރެން ވަރަށް އުފާވިއެވެ. އެހެން މީހުންގެ މައްޗަށް ބަރޯސާނުވެ އުޅުމަކީ އަހަރެން އެންމެ އެދޭ ގޮތެވެ. ނަމަވެސް އެ ހިތްހަމަޖެހުން ދެމިއޮތީ އެދުވަހުގެ ކިޔެވުން ނިމެންދެނެވެ. އަހަރެން ސްކޫލުން ނުކުތްއިރު ސްކޫލާއި ތަންކޮޅެއް ދުރުން ގެއެއްގެ މަގުމަތީ ފާރުގައި ލެނގިލައިގެން ޝަހޫދައްތަ ހުއްޓެވެ.

-ނުނިމޭ-

Mamma Dharifulhu Naa Na Naa 11

ދޯނީގައި ހުރެގެން އެކި މީސްމީހުންގެ މޫނަށް ވަކިވަކީން ބަލަމުން އަހަރެން ގެންދިޔައީމެވެ. އަހަރެންނަށް އަލްވަދާއު ކިއުމަށްޓަކައި ތިމާގެ މީހުންގެ އިތުރުން އަހަރެންގެ ހުރިހައި ރައްޓެހިން އަތިރިމައްޗަށް އައިސް ތިއްބެވެ. އަހަރެން ރަށަށް އައި ދުވަސް މަތިން އަހަރެން ހަނދާން ވިއެވެ. އެދުވަހު އަހަރެންނަށް އިހުސާސް ކުރެވުނީ ބީރައްޓެހި ކަމެވެ. އެދުވަހު ރަށަށް އަރައިގެން މާމައާއި އެކު ހިނގާފައި ދިޔައިރު ގޭގޭގެ ފާރުމަތިން ބޯދިއްކޮށްގެނާއި ޖޯލިފަތި ތަކުގައި ތިބެގެން މީހުން އަހަރެންނާ ދިމާއަށް ބަލަމުން ދިޔަގޮތް އަހަރެން އިއްޔެ ވީ ކަމެއްހެން ހަނދާން އެބަ ހުއްޓެވެ.

'އެއީތަ އެކުއްޖާ؟' އަހަރެން ރަށަށް ފޭބިއިރު އަތިރިމަތީ ހުރި ޖޯލިފައްޗެއްގައި އޮތް މެދުއުމުރުގެ އަންހެނަކު އެ ޖޯލިފަތީގައި އޮތް އެހެން މީހެއް ކައިރީ ބުނިއަޑު އިވުނެވެ.

'އާނ... ބަލާލާފަވެސް އެނގެއެއްނު!' އެމީހާ ޖަވާބު ދިނެވެ.

'އާނ... ވަރައް ވައްތަރުދޯ... ވަކިކުރަންވެސް ނޭންގޭ!'

އަހަރެން މާމައަށް ބަލާލީމެވެ. މާމަގެ މޫނުމަތީގައިވި އަސަރުތައް ދެނެގަންނާކަށް އަހަރެންނަކަށް ނޭންގުނެވެ. އެމީހުން ދެއްކި ވާހަކައަށް އަޅާވެސްނުލާ މާމަ އަހަރެންގެ އަތުގައި ހިފައިގެން ހިނގައިގަތެވެ. ފަޚުރުވެރިކަމާކެކު އިސް އުފުލައިގެން ހުރެއެވެ.

އަތިރިމަތީގައި ތިބެގެން އަހަރެންނަށް ޓާޓާ ކިޔަމުން ދިޔަ ރައްޓެހީންނަށް އަހަރެންވެސް އަތް ހޫރާލީމެވެ. ހުރިހައި ރައްޓެހީންނާ ވަކިވާން ޖެހޭތީ އަހަރެން ވަރަށް ދެރަވިއެވެ. އެރައްޓެހީން ނުލިބުނުނަމަ އަހަރެން ރަށުގައި ހޭދަކުރި ދުވަސްތައް ވަރަށް އެކަނިވެރި ވީހެވެ. ނަޒީދައްތަ ރަށަށް އަންނާނެ ދުވަހަކަށް އިންތިޒާރު ކޮށްކޮށް އަހަރެން މޮޔަވީހެވެ. އެކަމަކު ސްކޫލަށް ވަނުމުން ރަޙުމަތްތެރީން ލިބި، އަހަރެންގެ އެކަނިވެރިކަން ފިލައިގެން ދިޔައެވެ. އެކަމަކުވެސް ނަޒީދައްތަ ރަށަށް އަންނާނެ ދުވަހަކަށް އަހަރެން އިންތިޒާރު ކުރީމެވެ. އެއިންތިޒާރަށް ނިމުމެއް މިއައީ ނަޒީދައްތަ ލޮލަށް ނުފެނިއެވެ. މިއަދު އަހަރެން މިވަނީ ރަށް ދޫކޮށް ދާންޖެހިފައެވެ.

'ފައުޒީ!' ރަށު އޮފީހުގެ ސެކެޓްރީ ގޮވާލި އަޑު އިވުމުން އަހަރެން އޭނާއަށް ބަލާލީމެވެ. މާމަ ދުނިޔޭގައި ހުރިއިރު ކޮންމެ ދުވަހަކުވެސް މާމަގެ ޙާލު ބަލާލަން އޭނާ އާދެއެވެ. އެއީ މާމަގެ ކޮންމެވެސް ވަރެއްގެ ތިމާގެ މީހެކެވެ. މާމަ ނިޔާވުމުން އަހަރެން އުޅުނީ އެގޭއައެވެ. އަހަރެންގެ އެހެން ތިމާގެ މީހުންވެސް ތިބެއެވެ. އެކަމަކު އެމީހުން އަހަރެން ގެންދާކަށް ބޭނުމެއް ނުވިއެވެ.

ސެކެޓާރީ އާއި އެންމެ ފުރަތަމަ ދިމާވީ އަހަރެން ރަށަށް އައި ދުވަހުއެވެ. 'ފައުޒީގެ ބައްޕަ މިއަދު އެކެއް ޖަހާއިރު ގުޅާނެ.' އޭނާއައީ ބައްޕަ އަހަރެންނަށް ގުޅާނެ ވާހަކަ ބުނާށެވެ. އަހަރެން މާމައާއިއެކު އެކެއްޖެހި އިރު އޮފީހަށް ދިޔައީމެވެ. އަދި ބައްޕަގެ ފޯނުކޯލު އައުމުން އަހަރެން ވަރަށް ރުއިމެވެ. ބައްޕަ އަހަރެންނަށް ވަރަށް ނަޞޭޙަތް ދިނެވެ. ނުރޯށޭ ބުނެ ހިތްވަރު ދިނެވެ. އަދި ބައްޕަ އަހަރެންގެ ޙާލު ބަލާނެ ކަމުގައި ބުންޏެވެ. މަންމަވެސް އަހަރެންނާ ވާހަކަ ދެއްކިއެވެ. ނަމަވެސް ދޯނިމަތީ ހޮޑު ލެވުނުތޯ އަހާލުމަށްފަހު ބައްޕަގެ އަތަށް ފޯނު ދިނީއެވެ.

އެހަފުތާގައި ދެފަހަރު ބައްޕަ އަހަންނަށް ގުޅިއެވެ. އެއަށްފަހު ނުގުޅާތާ ހަފުތާއެއް ވެފައި ބައްޕަ އަނެއްކާވެސް ގުޅިއެވެ. ދެން ގުޅީ އެއްމަސް ދުވަސް ފަހުންނެވެ. ގުޅާ ކޮންމެ ފަހަރަކުވެސް މަންމަ އަހަރެންގެ ޙާލު އަހާ ކަމަށާއި ސަލާމް ބުނާކަމުގައި ބައްޕަ ބުނެއެވެ. އެކަމަކު މަންމަ އެންމެ ފަހަރަކުވެސް އަހަރެންނަކަށް ނުގުޅައެވެ.

ބައްޕަގެ ކޯލުތައްވެސް މަދުވަމުން ގޮސް، އަހަރެއް ނުވަނީސް ގުޅުން އެއްކޮށް ހުއްޓާލިއެވެ. ބައްޕަ ގުޅާނެ ދުވަހަކަށް އަހަރެންނަށް އިންތިޒާރު ކުރެވުނެވެ. ސެކެޓްރީ އަހަރެމެން ގެއަށް އަންނަ ކޮންމެ ފަހަރަކު ބައްޕަ ނުގުޅާތޯ އަހާލެވެއެވެ. އެއިން ކޮންމެ ފަހަރަކު ސެކެޓްރީގެ ލޮލުން ހަމްދަރުދީގެ އަސަރު އަހަރެންނަށް ފާޅުވެއެވެ. ބައެއްފަހަރު ބައްޕަ ގުޅި ކަމުގައި ބުނެއެވެ. އެކަމަކު އެއީ އަހަރެން ދެރަނުކުރަންވެގެން ބުނާ އެއްޗެއްކަން އަހަންނަށް އެނގެއެވެ.

މާމަ ނިޔާވީ އަހަރެން ރަށަށް އައިތާ އަހަރަކާއި ދެމަސްވާން އުޅެނިކޮށެވެ. މާމަ ނިޔާވުމުން އެޚަބަރުދޭން ސެކެޓްރީ މާލެއަށް ގުޅިއެވެ. ނަމަވެސް ދެކެވުނު ވާހަކައެއް އަހަރެންނަކަށް ނޭންގެއެވެ.

'މިއަދަށްފަހު ފައުޒީގެ އާއިލާގަ އަހަރެން ނޫން އެހެން މީހަކު ނެތްކަމަށް ހީކޮށްލާ!' ސެކެޓްރީ އަހަރެން ކައިރީ ބުންޏެވެ. ވެގެން އުޅޭގޮތް ކޮންމެވެސް ވަރަކަށް އަހަރެންނަށް ވިސްނުނެވެ. އަހަރެންގެ ހިތަށް ވަރަށް އަސަރުކުރިއެވެ. އެއްވެސް މީހަކަށް އަހަރެންނަކީ މުޙިއްމު މީހަކަށް ނުވަނީއެވެ. އެންމެން އަހަރެންދެކެ އެހާ ރުޅިއަންނަނީ ކީއްވެކަން އަހަންނަށް ހަމަ ވިސްނާ ވިސްނާވެސް ނޭންގުނެވެ.

މޫސަބޭ އަހަރެންގެ ބޮލުގައި ފިރުމާލުމުން އަހަރެން މޫސަބެއަށް ބަލާލީމެވެ. އަދި ލޮލުގައި ހުރި ކަރުނަތައް ފުހެލުމަށްފަހު، އަހަރެންނަށް އަލްވަދާއު ކިޔަން އައިސް ތިބި މީހުންނަށް އަދިވެސް އެއްފަހަރު ހަނާ އަޅާލީމެވެ.

އަހަރެންނަށް މޫސަބޭއާއި ދިމާވީ ރަށުގެ މިސްކިތުންނެވެ. ރަށުގެ ކުޑަ މިސްކިތަށް އަންނަ މަދު މީހުންކޮޅުގެ ތެރެއިން ފަންސާހަކަށް އަހަރުގެ އާމޫނެއް ފެންނަން ފެށުމުން އެއީ ރަށު މީހެއް ނޫންކަން އަހަންނަށް އެނގުނެވެ.

'ކޮއްކޯ...' އެއްދުވަހަކު އަހަރެން ނަމާދުކޮށް ނިމިގެން މިސްކިތުން ފޭބިތަނާ މޫސަބޭ އަހަރެންނަށް ގޮވާލިއެވެ.

އަހަރެން މޫސަބޭއަށް ބަލާލީމެވެ.

'ކޮއްކޮއަށް ކޮންނަމެއް ކިޔަނީ؟' އޭނާ އެހިއެވެ.

އަހަރެން ނަން ބުނީމެވެ.

'ތީ ކޮންގެޔަކު ކުއްޖެއް؟' މޫސަބޭ އެހިއެވެ.

އަހަރެން ގޭގެ ނަން ބުނީމެވެ. އަދި މޫސަބޭގެ އެދުމުގެ މަތިން އަހަރެމެން ގެއަށް މޫސަބޭ ގެންދިޔައިމެވެ. އަހަރެން ފަސްވަގުތު މިސްކިތަށް ނަމާދަށް ދާތީ އެކަމާ ގުޅިގެން ސެކެޓްރީ ކައިރީ މޫސަބޭ އަހަރެންނަށް ވަރަށް ތަޢުރީފު ކުރިއެވެ. ސެކެޓްރީ އަހަރެންގެ ވާހަކަ މޫސަބޭއަށް ވަރަށް ތަފްސީލުކޮށް ކިޔައިދިނެވެ. އަހަރެން މާލެ ގެންގޮސްގެން ކިޔަވައިދޭން މޫސަބޭ ބޭނުން ވިއެވެ. މޫސަބޭ އަކީ މާލޭ މީހެކެވެ. އޭނާ ރަށަށް އައިސް އުޅުނީ ރަށުގައި އުޅޭ އޭނާގެ ރައްޓެއްސަކާ އެކުއެވެ.

ސެކެޓްރީވެސް ބޭނުންވީ އަހަރެން މާލެ ފޮނުވާށެވެ. ރަށުގައި މާމައްޗަށް ކިޔެވެންވެސް ނުހުންނަ ކަމަށާއި މާލެގޮސް ރަނގަޅަށް ކިޔެވުމަށް ނަޞޭޙަތް ދިނެވެ.

އަހަރެން ރަށަށް އައިތާ ދެއަހަރާއި ދެދުވަސް ފަހުން އަނެއްކާ އެނބުރި މާލެދާން ޖެހިފައި މިވަނީ ނުވެސް ދަންނަ ބައެއްގެ ކައިރިއަށެވެ. މާލޭގައި އަހަރެންގެ އާއިލާގެ މީހުން ދިރި އުޅެމުން ދަނިކޮށެވެ.

ދޯނި ފަޅުން ނުކުތް އިރުވެސް އަހަރެން ދޯނީގެ ކަފިގަނޑު ކައިރީ ކޮޅަށް ހުރީމެވެ. އަތިރިމައްޗަށް ބަލަހައްޓައިގެންނެވެ. އެވަގުތު ރަށަށް ލަފަންވެގެން އައި ދޯންޏަކާ ދިމާއަށް އަހަރެންނަށް ބަލާލެވުނެވެ. އެދޯނީގައި ނަޒީދައްތަ އިންދާ އަހަންނަށް ފެނުނެވެ. ނަޒީދައްތަ އިނީ އަހަންނަށް ބަލަހައްޓައިގެނެވެ. އޭނާގެ މޫނުމަތީގައި ކޮނަމެވެސް ވަރެއްގެ ހައިރާން ކަމަކާއި ހިތާމަވެރި ކަމެއް ވީކަމުގައި އަހަންނަށް ހީވިއެވެ.

އަހަރެން މޫނު އަނބުރާލީމެވެ. ނަޒީދައްތައާއި ދިމާއަށް ބަލަން އަހަރެންނަށް ކުޅަދާނަ ނުވީއެވެ. ރުޅިއާއި، ހިތާމަޔާއި، ވޭނާއި، ހިތްދަތިކަން އަހަރެންގެ ހިއްސުތަކަށް ވެރިވެގެން ދިޔައެވެ.

-ނުނިމޭ-

Mamma Dharifulhu Naa Na Naa 10

އަހަރެން އެނބުރި ބަލާލިއިރު ބައްޕަ އަހަރެންނާ ދިނާއަށް ހިނަގާފަ އަންނަނީއެވެ. ބައްޕަޔާ އެކުއެކީހެން މަންމަވެސް ހިނގާފައި އާދެއެވެ.

'އާދެބަލަ ބައްޕަޔާއެކު!' އަހަރެންގެ ކައިރިއަށް އައިސް އަތުގައި ހިފަމުން ބައްޕަ ބުންޏެވެ. އަދި އަހަރެންގެ އަތުން ދަބަސް އަތުލިއެވެ.

އަހަރެން މާމަގެ މޫނަށް ބަލާލީމެވެ. ވާނުވާ ނޭންގިފައި ހުންނަ ފަދަ ގޮތަކަށް މާމަ ހުއްޓެވެ.

'ކިހިނެއް ވީ ނަޒީފު؟' މާމަ ބައްޕަކުރެން އެހިއެވެ.

'ނަޒީފު ބޭނުމެއް ނުވޭ ނޮވެމްބަރ އެގާރައިގެ ކުރިން ފައުޒީ ފޮނުވާކަށް'. މަންމަ ޖަވާބު ދިނެވެ. އަހަރެން ބައްޕަގެ މޫނަށް ބަލާލީމެވެ. ބައްޕަ ހިނިތުން ވެލިއެވެ. އަދި އަހަރެމެން ދެމީހުން އެކުގައި އެތެރެއަށް ހިނގައިގަތީމެވެ.

'މަންމަވެސް މަޑުކުރަންވީނު؟' މަންމަ ބުނިއަޑު އިވުނެވެ.

އަހަރެން ވަރަށް އުފާވިއެވެ. މިފަހަރު ނޮވެމްބަރ އެގާރައިގައި ވަރަށް ކުޅިވަރުތައް އޮންނަ ވާހަކަ އަހަރެންވެސް ވަނީ އަޑު އަހާފައެވެ. އެދުވަހަށް އަހަރެންނަށްވެސް އައީ އިންތިޒާރު ކުރެވެމުންނެވެ.

11 ނޮވެމްބަރ 1993 ވެގެން ދިޔައީ އަހަރެން ހީވެސް ނުކުރާފަދަ ކުލަގަދަ އުފާވެރި ދުވަހަކަށެވެ. އެދުވަހަށް ތައްޔާރުވުމުގެ ގޮތުން މުޅި މާލޭގެ މަގުތަކަށް ދޮންވެލި ލާ، މަގުތަކުގެ މަތީގައި ކުލަކުލައިގެ ބޮކިފަތިތަކާއި، ފެއްސާ، ރަތާ، ހުދުގެ ދިދަފަތިތައް ދަމާ މުޅިމަގުތައް ހިޔާކޮށްލިއެވެ. ގޭގޭގައި ކުލަލައި، މަގުމަތީފާރުތަކާއި ގަސްތައް ކުލަކުލައިގެ ނިވިދިއްލޭ ބޮކިތަކުން ފަޅުފިލުވާލިއެވެ. އަވަށު އޮފީހުން ކޮންމެ ގެއަކަށްވެސް ވަކިވަރަކަށް ބޮކިފަތި ދިނެވެ. އަހަރެމެން ގެއަށްވެސް ހަ ބޮކިފަތި ލިބުނެވެ.

އަހަރެމެން ގޭދޮށު މަގަށް ދޮންވެލި ލުމުގައި އަހަރެންނާއި ދޮންބެވެސް ބައިވެރިވީމެވެ. އަހަރެމެން ވެލިލުމުގެ މަސައްކަތުގައި އުޅުނުއިރު ނަޒީދައްތަ ގޭގެ ދޮރުމަތީގައި ހުރެއެވެ. އަހަރެންނާ ދިމާއަށް ހިނިތުން ވެލައިގެނެވެ. ވެލިލުމާއި ބޮކިފަތި ދެމުމުގައި އުޅުނު މީހުން ބުއިމަށްޓަކައި ބޮޑު ތެއްޔެއްގައި ޖޫސް ގިރާފައި އަބަދުވެސް ހުރެއެވެ. އަހަރެމެންގޭ ކުރިމަތީ ހުރި ގެއިން މެދުނުކެނޑި ބާރަށް ލަވަޖަހާފައި ހުރެއެވެ. 'އިންފޯމަރ' އަދި 'އައިސް އައިސް ބޭބީ' އަކީ އަހަރެންނަށް އެދުވަސްވަރު މެދުނުކެނޑި އަޑުއިވިއިވި ރީތިވި ދެލަވައެވެ. ދެލަވައިންކުރެ އެއްލަވައިގައިވެސް ކިޔާއެއްޗެއް އަހަރެންނަކަށް ދޭހައެއް ނުވެއެވެ. އެކަމަކުވެސް އަހަރެންނަށް އެދެލަވަ ވަރަށް ރީތިވިއެވެ.

ނޮވެމްބަރ އެގާރަ ވަނދުވަހުގެ ރޭ އަހަރެމެން އެންމެން މާލެތެރެ ބަލާލުމަށްޓަކައި ޕިކަޕެއްގައި ދުއްވާލަން ދިޔައީމެވެ. ގޭ އެންމެން ގޮވައިގެން ދުއްވާލަން ދިއުމަށްޓަކައި ބައްޕަ ޕިކަޕެއް ކުއްޔަށް ހިފީއެވެ. ޝަހޫދައްތައާއި ނަޒީދައްތަވެސް އަހަރެމެންނާއެކު ދިޔައެވެ.

ބައެއް ގޭގޭއާއި ތަންތަނުގެ ފާރުތަކުގައި ނިވިދިއްލޭ ބޮކިތަކުން ހަދާލާފައިވާ މަންޒަރުތައް ފެނުމުން އަހަރެން ހައިރާންވެ އަންތަރީސް ވާހައި ވިއެވެ. ޚާއްޞަކޮށް ސިފައިންގޭގެ ފާރުގައި ނިވިދިއްލޭ ބޮކިން ހަދާފައިވާ މަންޒަރު ފާހަގަ ކުރެވުނެވެ. ކޮންމެވެސް އެއް މަގެއްގައި މައުމޫނުގެ ވަރަށް ބޮޑު ފޮޓޯއެއް ބަހައްޓާފައި ހުއްޓެވެ. އެއީ ކުރަހާފައި ހުރި ފޮޓޯއެއްކަން އެނގުމުން އަހަރެން އާޝޯޚު ވިއެވެ.

'ނަޒީދައްތަ ރަށަށް ނުގޮސް މަޑުކުރާނީ.' އަހަރެން މާމައާއެކު ފުރަން އޮތް ދުވަހުގެ ކުރީރޭ ނަޒީދައްތަ އަހަރެން ކައިރީ ބުންޏެވެ. 'ފައުޒީ ކޮއްކޮގެ މަންމަ ބުނީ މަޑުކުރާށޭ... އެހެން ނޫނަސް ފައުޒީ ކޮއްކޮ ދިޔައިމަ ޖާދުﷲ ކޮއްކޮ އެކަނި ވާނެ އެއްނު.'

އަހަރެން ނަޒީދައްތަގެ އަތުގައި ބާރަށް ހިފާލީމެވެ. އަހަރެން އޮތީ ނަޒީދައްތަގެ އުނގުގައި ބޯ އަޅައިގެންނެވެ. ނަޒީދައްތަ ރަށަށް ނުދާން އެ ނިންމީ ޖާދުﷲ ކޮއްކޮ މިއަދު ރުއިތަން ފެނިގެން ހެއްޔެވެ؟ އަހަރެން ދާން އުޅޭކަން އެނގުމުން ޖާދުﷲ ކޮއްކޮ މިއަދު ވަރަށް ރޮއެހެދިއެވެ. ރަށަށް ނުދާށޭ ކިޔައިގެންނެވެ. އެކަމަކު މަންމަވެސް ބޭނުންވަނީ އަހަރެން މާމައާއިއެކު ފޮނުވާށެވެ. ބައްޕަވެސް އެކަމަކާ ދެކޮޅެއް ނުހަދައެވެ. ބައްޕަ، ނުދާށޭ ނުވަތަ ދާންބޭނުން ނޫންހޭ އަހާލިނަމަވެސް އަހަރެން މާމައާއި އެކު ރަށަށް ދިއުމާ ދެކޮޅު ހެދީމުހެވެ. އެކަމަކު ބައްޕަ ނާހާނެކަން އަހަންނަށް އެނގެއެވެ.

'ދެން މާމަ ބަލާނެ މީހަކު ނުހުންނާނެ އެއްނު.' އަހަރެން ބުނީމެވެ.

'ފައުޒީ ކޮއްކޮ ތިހުރީނު... ތިމާގެ މީހުންވެސް ތިބޭނެ އެއްނު ރަށުގަ.'

'ދެން ނަޒީދައްތަ ނުވެސް ފެންނާނެ އެއްނު' އަހަންނަށް ރޮވުނެވެ. 'ނަޒީދައްތަ ދާންވާނެ!'

'ފައުޒީ ކޮއްކޮ ދިޔައިމަ މަންމަ ޖާދުﷲ ކޮއްކޮ އާއިމެދު ކަންތައް ކުރާނެ ގޮތެއްވެސް ނޭންގެ އެއްނު.' ނަޒީދައްތަ އަހަރެންގެ ބޮލުގަ ފިރުމާލިއެވެ. 'ނަޒީދައްތަ ޖާދުﷲ ކޮއްކޮ ބަލާނަމޭ... ކޮއްކޮއަށް ދެރަގޮތެއް ވާކަށް ބޭނުމެއް ނޫނެއްނު ދޯ؟'

އަހަރެން ބޯޖަހާލީމެވެ. 'އެކަމު މަންމަ ކޮއްކޮދެކެ ލޮބި ވެޔޭ!'

'އެއީ ފައުޒީކޮއްކޮ ޖާދުﷲ ކޮއްކޮގެ ހުރިހައި ކަމެއް ބަލަހައްޓާތީނު... ކޮއްކޮ ގޭތެރެއަށް ސީލީމަވެސް ސާފުކުރަނީ ފައުޒީ ކޮއްކޮއެއްނުދޯ؟'

އަހަރެން އަނެއްކާވެސް ބޯހަލުވާލީމެވެ. ނަމަވެސް އަހަރެންގެ ހިތް ނަޒީދައްތަ މަޑުކުރާކަށް ނޭދެއެވެ.

'ފައުޒީ ކޮއްކޮ ނެތިއްޔާ ސާފުކުރާނެ މީހަކުވެސް ނުހުންނާނެއެއްނު... ދެން މަންމަ ރުޅި އަންނާނެ އެއްނު ކޮއްކޮދެކެ.' ނަޒީދައްތަ އަހަންނަށް ވިސްނައިދިނެވެ. 'މާމަވެސް ބުނިއްޔޭ އެހެންވެ ނަޒީދައްތަ ކައިރީ ރަށަށް ނުގޮސް މަޑުކޮށްދޭށޭ.'

އަހަންނަށް ހަމަ ރަނގަޅަށްވެސް ރޮވޭގޮތްވިއެވެ. އަހަރެން ނަޒީދައްތަގެ އުނގުގައި މޫނު ފޮރުވީމެވެ.

'ނަޒީދައްތަ އަދި ދާނަމޭ ރަށަށް.' އަހަރެންގެ އިސްތަށިގަނޑުގައި ފިރުމަމުން ނަޒީދައްތަ ބުންޏެވެ. 'ނަޒީދައްތައަށް އަބަދު މިތާކު ނުވެސް ހުރެވޭނެ އެއްނުދޯ؟'

އެރޭ އަހަރެންނަށް އަނެއްކާވެސް އެ ހުވަފެން ފެނުނެވެ. ޝަހޫދައްތައާއި އެކު އެރީތި ތުނޑި މައްޗަށް ދާތަނެވެ. އަދި ގޮނޑުދޮށުގައި ފައިގަނބާ ތަނެވެ. ދެން އެ ފުންމިން ނޭނގޭ ވަޅުގަނޑުގެތެރެއަށް އަހަރެން އަރިއަޅާލާތަނެވެ. ހޭލެވުނު އިރު އަހަރެން އޮތީ ދާހިއްލާ ފޯވެފައެވެ. އަހަރެންގެ މޫނާއި ދިމާއަށް ބަލަހައްޓައިގެން ދޮންބެ އޮތެވެ. ދޮންބެ ކައިރީ ގުދުވެގެން އަހަރެންނާ ދިމާއަށް ބަލަން ހާސްވެފައި އަޒޫ އޮތެވެ. ދެމީހުން ކުރެ އެކަކުގެ ހަށިގަނޑުގައިވެސް ފޭރާމެއް ނެތެވެ. އަހަރެންނަށް ބަލަން އޮވެވުނީ އަޒޫގެ މޭމައްޗަށެވެ.

'އަނެއްކާވެސް ހުވަފެނެއް ފެނުނީތަ؟' ދޮންބެ އެހިއެވެ.

އަހަރެން ދޮންބެއަށް ބަލާލީމެވެ. އަދި ބޯޖަހާލުމަށްފަހު އަނެއްކާވެސް އަޒޫއާ ދިމާއަށް ބަލާލީމެވެ. އޭރު ހުރެވުނު ހާލަތު އަޒޫ އަށް އިޙުސާސް ކުރެވުނީ ކަންނޭންގެއެވެ. އޭނާ އަވަސް އަވަހަށްގޮސް ގޮދަޑީގެ ބެޑްޝީޓް ނަގާ ގައިގާ އޮޅާލިއެވެ. އަދި ރޯނުގައި އޮތް ތުވާލި ދޮންބެއާ ދިމާއަށް އެއްލިއެވެ.

އަހަރެން ރަށަށް ދިއުމަށްޓަކައި މާމައާއިއެކު އަނގަމަތި މަސްދޯންޏެއަގައި ފުރީ އަނެއް ދުވަހުގެ ހަވީރުއެވެ. އެއީ އަހަރެން ކަނޑު މައްޗަށް އަދި ދޯންޏަކަށްވެސް އެރި ފުރަތަމަ ފަހަރެވެ. ނަމަވެސް އަހަރެން އެއްވެސް ޖެހިލުމެއް ނުވެއެވެ. ދޯނީގެ އިންޖީނު ފޮށިގަނޑު ކައިރިން މަޅު އަޅާފައިވާ ބައިގައި މާމައާއި އަހަރެން ތިބިއިރު އެއްވެސް ވާހަކައެއް ނުދައްކަމެވެ. އަހަރެމެން ތިބި ދިމާއިން ފަރުމާނު މަތިން ދެފަރާތަށް ސަތަރިއެއް ދަމައިގެން އަހަރެމެންނަށް ހިޔާކޮށްދިނުމަށްޓަކައި ދޯނީގެ މީހުން އޭރު ދިޔައީ މަސައްކަތް ކުރަމުންނެވެ. ރޭގަނޑު ވާރޭ ވެހިދާނެ ކަމަށެވެ.

އަހަރެން އިނީ އޮއްސެމުން ދިޔަ އިރާ ދިމާއަށް ބަލަހައްޓައިގެނެވެ. އޮރެންޖް-ރަތް ކުލައެއްގައިވާ އިރުގެ ވަށައިގެން އުޑުމަތި ވަނީ އެކި ކުލަކުލައިން ޒީނަތްތެރިވެފައެވެ. އުޑުމަތީގައި ހުރި ކުދިކުދި ވިލާކޮޅުތަކުގެ ކައިރިފައްތައް މަޑު އޮރެންޖް ކުލަޔަކުން ފަވާލާފައި ވާކަހަލައެވެ. އިރުގެ ރަތް ދޯދިތައް ކަނޑުގެ ޞަޠަޙައަށް މަޑު ރަތްކުލައެއް ވެރިކުރުވާފައިވެއެވެ. އެހިތްގައިމު މަންޒަރުން އަހަރެންނަށް އެއްވެސް އުފާވެރިކަމެއް ނުލިބުނެވެ. އިރުވެސް އެންމެފަހުން އަހަރެންނާ އަލްވަދާއު ކިޔަނީއެވެ. މުޅި ދަތުރަށް ނާމާން އަނދިރިކަން ވެރިކުރުވަމުންނެވެ. އާދުވަހަކަށް އަލިވިލުމަށް ޓަކައެވެ. އެކަމަކު އެ އަލިވިލުމުން އަހަރެންގެ ޙަޔާތަށް އަލިކަން ފޯރާނީ ކިހައި މިންވަރަކަށް ކަން ވިސްނާލަންވެސް ނޭންގިފައި އަހަރެން އިނީމެވެ.

-ނުނިމޭ-

Mamma Dharifulhu Naa Na Naa 9

ގޮދަޑީގައި އޮށޯވެގެން އޮތް ދޮންބެގެ ގައިމަތީގައި އިށީންދެގެން އިނދެ މަޑުމަޑުން ހަރަކާތްތެރިވަމުން ދިޔަ ޒުވާން އަންހެން ކުއްޖަކަށް އަހަރެންގެ ނަޒަރު ގޮސް ހުއްޓުނެވެ. އޭނާގެ ޒުވާން ހަށިގަނޑުގައި އެއްވެސް ފޭރާމެއް ނެތެވެ. ނިދާބޮކީގެ ފަނޑު އަލީގެތެރެއިން އެނާގެ ނާޒުކު ގުނަވަންތަކަށް ބަލަން އޮތްއިރު، މީ ފެންނަ ހުވަފެނެއް ނޫންބާއޭ އަހަރެންގެ ހިތަށް އެރިއެވެ.

އެއީ އަހަރެން ކުރިން ދެކިފައި ނުވާ އަންހެން ކުއްޖެކެވެ. އެމަންޒަރަކީ އަހަރެންނަށް ކުރިން ސިފަވެފައިވާ މަންޒަރެއް ނޫނެވެ. އަންހެން ވަންތަ ހަށިގަނޑެއްގެ ފުރިހަމަކަމާއި އެފަދަ ހަށިގަނޑަކުން ލިއްބައިދޭނެ އަރާމާއި އުފަލާއިމެދު އަހަރެންނަށް އެންމެ ފުރަތަމަ ފަހަރަށް ވިސްނާލެވުނީ އެރެއެވެ.

އެމަންޒަރު ބަލަން އަހަރެންނަށް އޮވެވުނީ އަހަރެންގެ އަމިއްލަ އިޚުތިޔާރަކާއި ނުލައެވެ. ކޮޓަރިތެރެއަށް ފެތުރިފައިވާ އާދަޔާޚިލާފު މަޑު ވަހަކާއި އެ އަންހެން ކުއަޖާގެ ފަރި ހަރަކާތްރައް އެކުވެގެން އަހަރެންގެ މުޅި ހަށިގަނޑަށް މަސްތީ އަސަރުތަކެއް ވަނީ ވެރިކުރުވާފައެވެ. އަހަރެންގެ ހަށިގަނޑުގައި މަޑު ތުރުތުރެއް އުފެދިފައި ވިއެވެ. ގައިން ވަނީ ހީބިހި ނަގާފައެވެ. އަނގައިން ކުޅުދިޔާވެފައެވެ.

އެރެއަށްފަހު އަހަރެންނަށް ރޭގަނޑު ނިދޭގޮތެއް ނުވެއެވެ. ކޮންމެ ރެއަކުވެސް އެ އަންހެން ކުއްޖާ ދޮންބެ ކައިރިއަށް އާދެއެވެ. އެކުއްޖާ އަންނަނީ ދަންވަރުއެވެ. އޭނާ އަންނާނެ ވަގުތަކަށް އަހަރެންނަށްވެސް އިންތިޒާރު ކުރެވެން ފެށިއެވެ. އެ ފުރިހަމަ ހަށިގަނޑު ފެނުމަށް އެދެވެން ފެށިއެވެ. ވަގުތުން ދައްކާ ޝޯވއަށް އިންތިޒާރު ކުރެވެން ފެށިއެވެ.

އެރެއަށްފަހު ނަޒީދައްތައާމެދުވެސް އެހެން ނަޒަރަކުން ބެލެންފެށުނެވެ. ނަޒީދައްތައާއި ދިމާވާ ކޮންމެ ފަހަރަކު މޫނަށްވުރެ ބޮޑަށް ހަށިގަނޑަށް ބެލެން ފެށުނެވެ. ޝަހޫދައްތައަށްވުރެ ނަޒީދައްތަ އެތައް ގުނައެއް ރީތި ކަމުގައި އިޙުސާސް ކުރެވެން ފެށިއެވެ. ފޭރާމަކާއި ނުލާ ނަޒީދައްތަ ހުނަނާނެގޮތް ޠަޞައްވުރު ކުރެވެން ފެށިއެވެ.

'އަޒޫ...ދީބަލަ ތިއޮއް ސިގިރޭޓުފޮށި!' އެއްރެއަކު ޝޯވ ނިންމާލުމަށްފަހު އަހަރެން ދެލޯ މަރާލި ތަނާހެން ދޮންބެ ބުނިއަޑު އިވުނެވެ. އަހަރެން ކުޑަކޮށް ހައިރާންވާގޮތް ވިއެވެ. ދޮންބެ ސިގެރޭޓްވެސް ބޮއެހެއްޔެވެ؟ އަހަރެން ލޯހުޅުވާފައި ޔަޤީން ކޮށްލަން ބޭނުންވިއެވެ. ނަމަވެސް ދޮންބެއަށް އަހަރެން ހޭލާ އޮތްކަން އެނގިދާނެތީ ލޯހުޅުވާލާކަށް ނުކެރުނެވެ.

ރޭގަނޑު ނިދި ނުލިބެން ފެށުމުން އަހަންނަށް ދުވާލު ނިދެން ފެށިއެވެ. އެކަމާ މަންމަގެ ރުޅި ގަދަވާން ފެށިއެވެ. ޓެސްޓަށް ފިލާވަޅުވެސް ދަސްކުރެވޭ ގޮތެއް ނުވެއެވެ. ފޮތުގައި އަތްލާ އިރަށް ނިދޭގޮތް ވަނީއެވެ.

'ދަރިފުޅާ!' މާމަ ގޮވާލި އަޑު އިވުމުން އަހަރެން ލޯހުޅުވާލީމެވެ. 'ދަރިފުޅު ބަލިވެތަ ތި އުޅެނީ؟' އަހަރެންގެ ނިތްކުރިމަތީ އަތުގެ ނުފުށް ޖައްސާލަމުން މާމަ އެހިއެވެ.

އަހަރެން ނޫނެކޭ ބުނުމުގެ ގޮތުން ބޯހޫރާލީމެވެ.

'ކީއްވެ ދަރިފުޅު އަބަދު ތި ނިދަނީ؟ ރޭގަނޑު ނުނިދެނީތަ؟'

އަހަރެން ޖަވާބެއް ނުދެމެވެ.

'މާމަ ރަށަށް ދާއިރު ދަރިފުޅުވެސް ދާންވީނު މާމައާއި އެކު.'

އަހަރެން ދެންވެސް ޖަވާބެއް ނުދެމެވެ.

'މަންމަ ބުނި މާމަ ކައިރިއަށް ދަރިފުޅު ގެންދިޔަޔަސް އެންމެ ރަނގަޅޯ.'

އަހަރެން ވިސްނާލީމެވެ. މާމަ ކައިރިއަށް ގޮއްސިއްޔާ ޝަހޫދައްތައެއް ނުފެންނާނެއެވެ. އެކަމަކު ނަޒީދައްތަ ކައިރީ އަބަދު އުޅެވޭނެއެވެ. އެކަމަކު ޝަހޫދައްތައާއި ބައްދަލު ނުކުރެވޭނޭ ތަނެއްގަ އުޅޭކަށް އަހަރެން ބޭނުމެއް ނުވެއެވެ. ނަޒީދައްތަ ކިތަންމެހައިވެސް ރީއްޗެވެ. އޯގާތެރިއެވެ. އެކަމަކު ނަޒީދައްތައަށްވުރެ ބޮޑަށް އަހަރެން ޝަހޫދައްތަދެކެ ލޯބިވެއެވެ.

'މާމަ މިއުޅެނީ މާދަމާ ފުރަން! މާމަ އޮންނާނެ ދަރިފުޅު ހެދުން އަޅަން ކުޑަ ދަބަހެއްވެސް ގަނެދީފަ.' މާމަ ވާހަކަ ދެއްކިއެވެ. 'މިހާރު ދަރިފުޅު ޓެސްޓްވެސް ނިމިއްޖެއްނު... ދެން ރަށު ސްކޫލަށް ވަންނާނީ.'

އަހަރެން ދެންވެސް ޖަވާބެއް ނުދެމެވެ.

'މާމަ ބޭނުމެއް ނޫން ދަރިފުޅު މިތާ ހުންނާކަށް... މާމަޔަށް އެނގޭ ދަރިފުޅު އުޅޭ ހާލު.'

އަހަރެން މާމަޔާއި ހަތަރުކަޅި ހަމަކޮށްލީމެވެ. މާމަގެ ލޮލުގައި ކަރުނައިގެ އަސަރު ވަނިކޮށް އަހަންނަށް ފެނުނެވެ.

'ދަރިފުޅު މިތަނުގެ ހުރެގެން ނުވެސް ކިޔެވޭނެ... މާމަ ބޭނުމެއް ނޫން ދަރިފުޅުގެ ދިރިއުޅުން ހަލާކުވެގެން ދާކަށް.'

އަހަރެން ލޯމަރާލީމެވެ. މާމަގެ އޯގާތެރިކަމުން ފުރިގެންވާ މޫނަށް ބަލަން ނުކުޅަދާނަ ވެގެންނެވެ. އަހަރެންނަށް އެ އޯގާތެރިކަމުގެ ސަބަބުން ކެތްކުރަން ދަތިވެއެވެ. އަހަރެން ރޯކަށް ބޭނުމެއް ނުވެއެވެ. ފިނޑިއަކަށް ވާން ބޭނުން ނުވާތީއެވެ. އެކަމަކުވެސް އަހަރެންނަށް ރޮވެއެވެ. ނުރޯން ކިތަންމެ މަސައްކަތެއް ކުރިޔަސް ކަރުނައިގެ މައްޗަކަށް އަހަންނަށް ބާރެއް ނުފޯރުވެއެވެ. މިއަދުވެސް އަހަންނަށް ވީ އެހެންނެވެ. މާމަގެ އޯގާތެރި ބަސްތައް އަޑުއިވެން ފެށުމުން އަހަރެންގެ ލޮލަށް ކަރުނަތައް ޖަމާވެ އެސްފިޔަތަކުގެ ތެރެއިން ފުރޭނިގެން ފައިބަން ފެށިއެވެ.

'ނުރޮއެ ދަރިފުޅާ!' އަހަރެންގެ ކަރުންތައް ފުހެލަމުން މާމަ ބުންޏެވެ. 'މާމަ މިފަހަރު ދަރިފުޅު ގޮވައިގެން ނޫނީ ރަށަކަށް ނުދާނަން!'

'މިހާރު ކިހިނެއް މިވަނީ!' މަންމަގެ އަޑު އިވުމުން އަހަރެން ލޯހުޅުވާލީމެވެ. އޭރު ކޮޓަރީގެ ދޮރުމަތީގައި މަންމަ ހުއްޓެވެ. 'ނުދާންވެގެން ބޮޑާ ހާކަނީ ދޯ؟ މާޅަވެގެން އުޅޭނެކަމެއް ނެތް ބޮޑުސިންގާ ފިރިހެނެއް!'

'އެސޮރު ނޫޅޭ ނުދާކަށް ދޯ ދަރިފުޅާ!' މާމަ އަހަރެންގެ ދިފާއުގައި ވާހަކަ ދެއްކިއެވެ.

'ބޮޑުވި ބޮޑުވިހެން މީނަގެ ކަންތައް ބޮޑޭވަނީ...' މާމަގެ ވާހަކައަށް އަޅާވެސް ނުލާ މަންމަ ވާހަކަ ދެއްކިއެވެ. 'މިހާރު ދުވާލު ހަތަރުދަމު ނިދުން ނޫން އެހެން ކަމެއް ނުކުރޭ!'

'ސައުދާ!' މާމަ ވަރަށް ބާރަށް މަންމައާ ދިމާއަށް ބުންޏެވެ.

މަންމަ މާމައާއި ދިމާއަށް ބަލާލިއެވެ. އަދި މޫނު ހަދާލާފައި އެނބުރި ހިނގައިގަތެވެ. 'އެއްޗެކޭ ބުނެފިއްޔާ މަށަށްވުރެ ގޯސް މީހެއް ނުހުންނާނެ..' ދަމުންދަމުން މަންމަ ބުނިއަޑު އިވުނެވެ.

'އަޅާނުލާ ދަރިފުޅާ!' އަހަރެންގެ ބޮލުގައި ފިރުމާލަމުން މާމަ ބުންޏެވެ.

އަހަރެން ދަބަހަށް އެއްޗިހި އެޅީ ދެފިކުރެއްގައި ހުރެގެންނެވެ. އަހަރެން މާމަރަށަށް ދާކަށް ބޭނުމެއް ނޫނެވެ. ނަމަވެސް މާމަ އެހައި ލޯބިން އަހަރެން ގެންދަން އުޅޭތީ އެކަމާ ދެކޮޅު ހަދާކަށްވެސް ނުކެރުނެވެ. އެހެންނޫނަސް މަންމައާ ޚިލާފަށް މާމަ އަހަރެން ދެކެ ލޯބިވެއެވެ. މާމަ އަހަރެންނަށް ފުރިހަމައަށް އަޅާލާނެ ކަން އަހަންނަށް އެނގެއެވެ. އެކަމަކުވެސް މާމަގެ ލޯތްބަށްވުރެ ބޮޑަށް އަހަރެންނަށް އެދެވެނީ މަންމަގެ ލޯތްބަށެވެ.

އަހަރެންގެ ހުރިހައި ހެދުމެއް އެ ކުޑަ ދަބަހަށް އެޅުމުންވެސް ދަބަހުގައި އެތައް ތަނެއް ބާކީ ހުއްޓެވެ.

ދަބަސް ހިފައިގެން ބޭރަށް ނުކުތްއިރު ކާރުއައިސް އޮތެވެ. ކާރުކައިރީގައި މާމަ ކޮޅަށް ހުއްޓެވެ. މާމަ ކައިރީގައި، ކާރުގައި ލެނގިލައިގެން ނަޒީދައްތަ ހުއްޓެވެ.

'އަވަހަށް އާދޭ!' އަތުން ހަރަކާތް ކޮށްލަމުން މާމަ ބުންޏެވެ. އަހަރެން އެ ހުރި ފިޔަވަޅު މަތީ ހުއްޓި ހުރީއެވެ. 'ކިހިނެއްވީ ދަރިފުޅާ!' އަހަރެން ހުއްޓި ހުރުމުން މާމަ އެހިއެވެ. 'ދަރިފުޅު ދާން ބޭނުން ނޫނީތަ؟'

އަހަރެން ނަޒީދައްތަގެ މޫނަށް ބަލާލީމެވެ. ނަޒީދައްތަ ހިނިތުންވެލިއެވެ.

'ފައުޒީ!' ބައްޕަ ވަރަށް ބާރަށް ގޮވާލުމުން އަހަރެން ދިޔައީ ސިއްސައިގެންނެވެ.

-ނުނިމޭ-

Mamma Dharifulhu Naa Na Naa 8

އަހަރެން ބޭރަށް ނުކުތީމެވެ. ޝަހޫދައްތައާއި ނަޒީދައްތަ ކޮޓަރީގައި މަޑުކުރީއެވެ. އެދެ ދައްތަ ކުރީންވެސް އެކަކު އަނެކަކު ދަންނަކަމުގައި އަހަންނަށް ހީވިއެވެ. ސިޓިންގރޫމަގައި ހުރި ސަރަންފީ ގޮނޑީގައި އަނގަ ރަތްކޮށް ދުފާލައިގެން މާމަ އިނެވެ. މާމަ ކައިރިން ތަރުފާލުމަތީގައި ދޮންބެއާއި ތުއްތުބެ އިށީންދެގެން ތިއްބެވެ. އަހަރެން ކުރިންވެސް މާމަ ދުށީމެވެ. މަންމަގެ ފޮޓޯ އަލްބަމުގައި ހުރި ފޮޓޯތަކުންނެވެ. ނަމަވެސް މިހާރު މާމަ ވަނީ ފޮޓޯތަކުގައި ހުރި އިރަށްވުރެ އެތައް ގުނައެއް މުސްކުޅިވެފައެވެ. މޫނުމަތީ ރޫގިނައެވެ. ބޮލުގެ އެއްފަރާތަށް ހުޅިޖަހާފައިވާ އިސްތަށިގަނޑުގެ ހުރިހައި އިސްތައްޓެއްހެން ވަނީ ނުރައަށްވެފައެވެ.

'މަގޭ ދަރިފުޅު ފައުޒީތަ؟' އަހަރެން ފެނުމުން މާމަ ބުންޏެވެ. ދޮންބެއާއި ތުއްތުބެ އަހަރެންނާ ދިމާއަށް ބަލާލިއެވެ. 'މިހާރު ދަރިފުޅު ހާދަ ބޮޑުވެއްޖޭ ދޯ؟' މާމަގެ އަޑުގައި ބަލިކަމުގެ އެއްވެސް އަސަރެއް ނެތެވެ. 'އާދެބަލަ މާމަ ކައިރިއަށް.'

އަހަރެން މަޑުމަޑުން ހިނަގާލާފައި މާމަ ކައިރިއަށް ދިޔައިމެވެ. އެވަގުތު މަންމަމެންގެ ކޮޓަރީގެ ދޮރު ހުޅުވާލުމަށްފަހު ކުޑަކޮއްކޮ ގޮވައިގެން މަންމަ ސިޓިންގރޫމަށް ނުކުތެވެ.

'ދަރިފުޅު ކީއްވެތަ ތިހާ ހިކީ؟' އަހަރެންގެ މޫނުގެ ދެފަރާތުގައި ދެއަތުން ފިރުމާލަމުން މާމަ ބުންޏެވެ. 'ދައިފުޅު ރަނގަޅަށް ނުކަނީ ދޯ؟ ދަރިފުޅުގެ މަންމަ ބުންޏޭ ދަރިފުޅު ރަނގަޅަށް ނުކާވާހަކަ.'

އަހަރެން މަންމަގެ މޫނަށް ބަލާލީމެވެ. މަންމަ ހުރީ އަހަރެންނަށް ބަލަހައްޓައިގެންނެވެ. މަންމަގެ ލޮލުގައިވަނީ ފޫހިކަމާއި ނުރުހުމުގެ އަސަރެވެ.

'މާމަ ކާ ކޮންމެ ފަހަރަކު ދަރިފުޅުވެސް ދެން ވާނެ މާމައާއިއެކު ކާން!'

އަހަރެން މާމައަށް ބަލާލީމެވެ. މާމަގެ ލޮލުގައިވަނީ އޯގާތެރިކަމެވެ. އެދެލޮލުގައި މަޑުމަޑުން ކަރުނަ ފޭދެމުން ދިޔަހެން އަހަންނަށް ހީވިއެވެ. އަހަރެން ފެންކަޅިވާގޮތްވިއެވެ. މާމަ މަޑުމަޑުން ދެއަތަކަށް ބޯ ހޫރާލިއެވެ. އަހަރެންނާ ހަތަރުކަޅި ހަމަކޮށްގެން ހުރެއެވެ. ދެރަ ނުވާށޭ ބުނާފަދަ ގޮތަކަށެވެ. ހުރިހާ ކަމެއްވެސް ދެން ރަނގަޅުވާނޭ ބުނާފަދަ ގޮތަކަށެވެ.

'މަހުދީ!' ބައްޕަ ގޮވާލިއަޑު އިވުމުން އަހަރެމެން އެންމެންނަށް އެއްފަހަރާ ބަލާލެވުނެވެ. އޭރު ގޭގެ ދޮރުމަތީގައި ބައްޕަ ހުއްޓެވެ. 'ހިނގާބަލަ އެ ފިލާތަކާ ޓިނުތައް ޕިކަޕުން ބާލަން.'

ދޮންބެ ބައްޕަ ފަހަތުން ހިނގައިގަތުމުން އަހަރެންވެސް ދޮންބެގެ ފަހަތުން ހިނގައިގަތީމެވެ.

'ކީއަކުރާ ޓިނުތަކެއްތަ؟' ގޯތިތެރޭގައި އޮންނަ ހުސްތަނުގެ ތެރެއިންލާފައި ގޮސް މަގުމައްޗަށް ނުކުންނަމުން އަހަރެން ދޮންބެކުރެން އެހީމެވެ.

'އެއީ ދޮންބެއަށް ކޮޓަރި ހަދަން.' ދޮންބެ ހިނިތުންވެލާފައި ބުންޏެވެ. 'މިހާރު މާމަ އައީމަ ކޮޓަރީގަ ނިދާނެ ތަނެއް ނުހުންނާނެ އެއްނު.'

'ފައުޒީވެސް ނިދާނީ ދޮންބެ ކޮޓަރީގަ.' އަހަންނަށް ބަލާލަމުން ބައްޕަ ބުންޏެވެ. އަދި ދޮންބެގެ މޫނަށް ބަލާލިއެވެ.

އަހަންނަށްވެސް ދޮންބެއާ ދިމާއަށް ބަލާލެވުނެވެ. ދޮންބެގެ މޫނުމަތީގައި ހިތްހަމަ ނުޖެހުމުގެ އަސަރު ކޮންމެވެސް ވަރަކަށް ފާޅުވާން ހުއްޓެވެ. ނަމަވެސް ދޮންބެ ވަކި އެއްޗެކޭ ނުބުނެއެވެ. ދޮންބެވެސް އަހަރެންނާމެދު ހިތްހަމަ ނުޖެހެނީ ބާއޭ އަހަރެންގެ ހިތަށް އެރިއެވެ. އެކަމަކު ދޮންބެ އަހަރެންނަށް އަބަދުވެސް ވަރަށް ރަނގަޅެވެ. ވީއިރު ދޮންބެގެ ކޮޓަރީގައި އަހަރެން ނިދުމާމެދު ދޮންބެ ހިތްހަމަ ނުޖެހެންވީ ކީއްވެ ހެއްޔެވެ؟ އެވާނީ އަހަރެންނަށް ހީވި ގޮތަކަށެވެ.

ގެއާއި ވަކިން ގޯތިތެރޭގައި އެކޮޓަރި ހަދަން ފަސް ދުވަސް ނެގިއެވެ. އެދުވަސްތަކުގައި އަހަރެންނާއި ދޮންބެ ނިދީ ސިޓިންގރޫމްގައެވެ. ކޮޓަރީގެ މަތީއެނދުގައި ނިދަނީ ތުއްތުބެއެވެ. ތިރީ އެނދުގައި މާމައެވެ. ޖާދުﷲ ކޮއްކޮގެ ތަންމައްޗަކަށް ބަދަލެއް ނާދެއެވެ. އަހަރެންގެ ގޮދަޑިގައި ނަޒީދައްތައެވެ. އަހަރެން ކޮޓަރިތެރޭ، އެގޮދަޑީގައި ނިންދަވަން މާމަ ވަރަށް މަސައްކަތް ކުރިއެވެ. ބޭރުގައި ނިދިޔަސް ގޮދަޑި އަޅައިގެން ނިދާށޭވެސް ބުންޏެވެ. ނަމަވެސް އަހަރެން ބޭނުންވީ ނަޒީދައްތައަށް އެ ގޮދަޑި ދޭށެވެ. ނަމަވެސް އަހަރެން ކުނާމަތީ ނިދަނީ ނަޒީދައްތައަށް ގޮދަޑިދޭންވެގެންކަން މާމައަށް އެނގިއްޖެނަމަ މާމަ ނަޒީދައްތަދެކެ ރުޅިއަންނާނޭތީވެ، އެ ގޮދަޑިން ގައިކަހާ ކަމުގައި ބުނެ އަހަރެން އުޒުރު ދެއްކީމެވެ.

*******************

'މަހުދީ!' އަހަންނަށް ހޭލެވުނީ މަންމަ ދޮންބެއަށް ގޮވާއަޑަށެވެ. އޭރު ދޮންބެ ގޮދަޑިން ތެދުވެގެންގޮސް ކޮޓަރީގެ ދޮރު ހުޅުވަނީއެވެ. 'މިއަދު އޮފީހަށްވެސް ނުދާދުވަހަކީތަ؟' ދޮންބެ ކޮޓަރީގެ ދޮރު ހުޅުވުމުން މަންމަ އެހިއެވެ. ތިންވަނަ ޓާރމްގެ ޓެސްޓް ފެށިގެން އުޅޭތީ އަހަރެން ސްކޫލަށް ދާންޖެހެނީ ޓެސްޓް އޮންނަދުވަސްތަކުގަ އެކަންޏެވެ. މިއަދަކު ޓެސްޓެއް ނެތެވެ.

'ދޭބަލަ ފެންހަމެއް ހިފައިގެން އަންނަން... ނެތޭ ސައި ކެއްކޭކަށްވެސް ފެންނެތީމަ.' މަންމަ ބުންޏެވެ. އަދި ކުޑަކޮށް ބޯއަރިކޮށްލުމަށް ފަހު ކޮޓަރި ތެރެއަށް ބަލާލިއެވެ. 'މިއޮއް މީހާވެސް ގޮވައިގެން ދޭ!' އަހަނާ ދިމާއަށް މޫނުން އިޝާރާތް ކޮށްލަމުން މަންމަ ބުންޏެވެ.

'ކީއްކުރަން... އޭނައަކަށް ފެނެއްވެސް ނުގެނެވޭނެ އެއްނު!' ދޮންބެ ބުންޏެވެ.

'ކުޑަ ހުދު ހަމުގަ އޭނައަށްވެސް ގެނެވޭނެ ފެން! އިނަނާނެ އޭގެ ދެހަން.'

'ތެދެއް؟' އަހަންނަށް ބަލާލަމުން ދޮންބެ ބުންޏެވެ.

އަހަރެން އަވަސް އަވަހަށް ބޯޖަހާލީމެވެ. ދޮންބެއާއެކު ފެންބަލާ ދާން ބޭނުންވާތީއާއި މަންމަ ހިތްހަމަ ޖެހޭނޭތީއެވެ. ނަމަވެސް ފެނަބަލާ ދިއުމަށް އެއްބަސް ވެވުނީތީ ފަހުން ދެރަވިއެވެ. މިސްކިތުގައި ހުންނަ އިސްކުރުބަރިން އެ ދެހަން ފުރާ ފެން އަޅާއިގެން އަހަރެންނަށް އުފުލެނީ ކިރިޔާއެވެ. ފެންހަންތައް ހިފައިގެން ގެއާއި ހަމަޔަށް އާދެވުނުއިރު އަހަރެން ވަނީ ވަރުބަލިވެ މާނޭވާ ލެވިފައެވެ. މިސްކިތާ ގެއާ ދެމެދުގައިވާ ދުރުމިން ކުރިއަށްވުރެ އެތައް ގުނައެއް ދުރުހެންވެސް ހީވިއެވެ.

އެދުވަހަށްފަހު ކޮންމެ ދުވަހަކުވެސް އަހަންނަށް ފެންބަލާ ދާން ޖެހެއެވެ. ހެނދުނު އެކަންޏެއް ނޫނެވެ. ފެނަށް ބޭނުންވާ ވަގުތެއްގައި ދޮންބެ ގޭގައި ނެތިއްޖެނަމަ ފެންބަލާ ދާންޖެހެނީ އަހަންނަށެވެ.

'ދަރިފުޅާ ހާދަ ވަރުބަލިވެފަ! ކީއްކޮއްލާފަ ތި އައީ؟' ދެ ފެންހަން ހިފައިގެން އައިސް ބަދިގޭގައި ބަހައްޓަފައި ސިޓިންގރޫމަށް ވަނުމުން މާމަ އަހާލިއެވެ. އެއަޑަށް މަންމަ ކޮޓަރިން ނުކުތެވެ. އަދި އަހަރެންނާ ދިމާއަށް ކަޅި އަޅާލިއެވެ.

އަހަރެންނަށް ފެންބަލާ ދިޔަ ވާހަކަ މާމަ ކައިރީ ބުނާކަށް ނުކެރުނެވެ. ދޭނެ ވަކި އެހެން ޖަވާބެއްވެސް ނޭންގުނެވެ.

'ދުވެދުވެފަތަ ތި އައީ؟' މާމަ އެހިއެވެ. 'ކުޅެނީ ދޯ؟'

އަހަރެން އާނއެކޭ ބުނުމުގެ ގޮތުން ބޯޖަހާލީމެވެ. އަދި ސިޓިންގރޫމުގައި ޓީވީ ބަލަން އިށީންނީމެވެ. އޭރު ޓީ.ވީ.އެމް އިން 'ތަންޑަކެޓްސް' ކާރޓޫނު ދައްކަނީއެވެ. ތަންޑަކެޓްސް އަކީ އަހަރެން މާ ގަޔާވާ ކާރޓޫނެއް ނޫނެވެ. ނަމަވެސް އެހެން ކާރޓޫނެއް ދައްކަން ފަށާނެ ވަގުތެއްގެ އިންތިޒާރުގައި ޓީވީ ކުރިމަތީ އިނީއެވެ.

އަހަރެން ޓީވީ ބަލަން އިންއިރު މާމަ އަހަރެންނާ ދިމާއަށް ބަލަން އިންކަމުގެ އިހުސާސް އަހަންނަށް ކުރެވެމުން ދިޔައެވެ.

***************

'ޝަހޫދައްތަ ކީއްކުރަންތަ މިއަދު ފައުޒީ ކޮއްކޮ ގޮވައިގެން ބަދިގެ ފުރަގަހަށް ދިޔައީ؟' އަހަރެންގެ ގޮދަޑި ކައިރީ ތަރުފާލުމަތީ އިށީންދެގެން އިނދެ ނަޒީދައްތަ އެހިއެވެ. އޭރު ދޮންބެ އަދި ނިދާކަށް ނާދެއެވެ.

'ޝަހޫދައްތަ ޗޮކަލެޓެއް ދިނީ.' ފުރާޅުގެ ޓިނުތަކާދިމާއަށް ބަލަން އޮވެގެން އަހަރެން ބުނީމެވެ.

'ޗޮކްލެޓެއްދޭން ކީއްކުރަން ބަދިގެ ފުރަގަހަށް ގެންދިޔައީ؟'

'ތުއްތުބެއަށް ފެނިދާނެތީ... އެހެންނޫނީ ތުއްތުބެ އަތުލާނެ.'

'އެހެންތަ؟'

އަހަރެން ބޯޖަހާލީމެވެ.

'ހުމމ... އެކަމު ޝަހޫދައްތައާއި އެކު ތަންތަނަށް ނުދައްޗޭ!' ނަޒީދައްތަ ނަޞޭޙަތުގެ ރާގެއްގައި ބުންޏެވެ.

'އެ ކީއްވެ؟' އަހަރެން ސުވާލު ކުރީމެވެ.

'އެއީ އެހާ ރަނގަޅުކަމެއް ނޫން... އަނެއްކާ ފައުޒީ ކޮއްކޮގެ މަންމަވެސް ހިތްހަމައެއް ނުޖެހޭނެ.'

'ޝަހޫދައްތަ ވަރަށް ރަނގަޅުވާނޭ!' އަހަރެން ޝަހޫދައްތަގެ ދިފާއުގައި ވާހަކަ ދެއްކީމެވެ.

'ނަޒީދައްތަ ނުބުނަމެއްނު ޝަހޫދައްތަ ގޯހެކޭ...'

'ދެން ކީއްވެ ޝަހޫދައްތައާއި އެކު ތަންތަނަށް ނުދާންވީ؟'

'އެދެން އެހާ ރަނގަޅު ކަމެއް ނޫންވީމަ.'

'އެކީއްވެ؟'

'ފައުޒީ ކޮއްކޮއަކަށް އަދި ނުވިސްނޭނެ... ދެން މާގިނަ ސުވާލުނުކޮށް އަވަހަށް ނިދާ.'

އަހަރެން ބަސްއަހައިގެން ދެލޯމަރާލީމެވެ. ނަމަވެސް އަހަރެންގެ ހިތުގައި އުފެދެމުން ދިޔަ ގިނަ ސުވާލުތަކުގެ ސަބަބުން އެތައް އިރެއް ވަންދެން ނުނިދިފައި އޮތީމެވެ. އެހެން އޮއްވާ ނިދި ލޮލަށް ސަވާރުވީ ކޮން އިރަކު ކަމެއްވެސް ނޭންގެއެވެ.

އަހަންނަށް ހޭލެވުނީ މީހަކު މަޑުމަޑުން ކުކުރާ އަޑަށެވެ. ހީވަނީ ތަނެއްގައި ރިއްސާތީ ކުކުރާހެންނެވެ. އެއަޑު އަންނަނީ ދޮންބެގެ ގޮދަޑިއާއި ދިމާއިން ކަމަށްވުމުން އަހަރެން އެދިމާއަށް ބަލާލީމެވެ. އެވަގުތު އަހަރެންގެ ހިތް ބާރުބާރަށް ތެޅިގަތެވެ. ދެލޯބޮޑުވެ، ނޭވާ އަވަސްވެގެން ދިޔައެވެ.

-ނުނިމޭ-