މަންމަގެ ނާނާގެ އަޑުކެނޑި އެތައްއިރެއް ވީއިރުވެސް އަހަރެންނަށް އަލުން ނިދޭގޮތެއް ނުވިއެވެ. ނުކައި އޮތުމުގެ ސަބަބުން އިންތިހާއަށް ބަނޑުހައި ވެފައި ވާތީއެވެ. އޭރު މަންމަ ކާންގޮވުމުން ނުގޮސް އޮވެވުނީތީ މިހާރު ދެރަވެއެވެ. ކިތަންމެ ބަނޑުހައިވިޔަސް ދެން ބަދިގެއަށް ވަދެ ކާކަށް ނުކެރޭނެއެވެ. މަންމަގެ ރުޅިގަނޑު އިތުރަށް ގަދަވާނެތީއެވެ. ރިހަތެލި ހޫނުކޮށްފައި ވަނިކޮށް އެއިން ރިހަނެގުން ވާނީ އަލިފާނަށް ދަރުއެޅުން ކަހަލަ ކަމަކަށެވެ.
މޫނުމަތީގައި ހިއްލާފައިވާ ދާތައް އަތުން ފުހެލުމަށްފަހު ސީލިންގގައި ހުރި ފަންކާއަށް އަހަރެން ބަލާލީމެވެ. ގަދަ އަޑެއް ކިޔާފައި، މަޑުމަޑުން އެނބުރޭ އެ ފަންކާއިން ކޮޓަރިތެރެއަށް ކުޑަކޮށްވެސް ފިނިކަމެއް ނުފޯރައެވެ. ނިދާބޮކީގެ ފަނޑު އަލީގެ ތެރެއިންވެސް ފަންކާގެ ފިޔަތަކުގެ ބުރު ވަކިކުރަން އެނގޭހައި ވެއެވެ. ފަންކާ ރަނގަޅު ކުރަންވެގެން ދޮންބެ އެތައް ފަހަރަކު މަސައްކަތް ކޮށްފިއެވެ. މިއަދުވެސް ތެޔޮދޯރިއަކުން ފަންކާއަށް ތެޔޮޖަހާ އުޅުނެވެ. ނަމަވެސް ފަންކާގެ އެނބުރުމަކަށް އެއްވެސް ބަދަލެއް ނާދެއެވެ. ދޮންބެ މަތީއެނދުގައި އޮންނަނީވެސް ފަންކާއިން ކޮންމެވެސް ވަރެއްގެ ފިނިކަމެއް ލިބޭތޯއެވެ. އެކަމަކު ތިރީ އެނދުގައި އޮތް ކުޑަބެއަށް ނުވާ ފިންޏެއް ދޮންބެއްކަށްވެސް ނުވާނެކަން ގައިމެވެ. ކުޑަކުޑަ ކޮޓަރީގައި އަހަރެންގެ ތަންމައްޗަކީ އެނދު ހުންނަ ފަޅިނޫން އަނެއް ފަޅީގެ ބިތްކައިރީގައި އޮންނަ ތުނި ގޮދަޑިއެކެވެ.
ކޮއްކޮ ގޮދަޑި މަތީގައި ފުރުޅިލި އަޑު އިވުމުން އަހަރެން ކޮއްކޮއަށް ބަލާލީމެވެ. ކޮޓަރީގެ މެދުގައި، ފަންކާ ދަށުގައި އޮތްއިރުވެސް ކޮއްކޮ ވަނީ ދާހިއްލާ ފޯވެފައެވެ. މިރޭ ވަކިން ހޫނުގަދަ ރެއަކީއެވެ. އަހަރެން މަޑުމަޑުން ގޮދަޑިން ތެދުވީމެވެ. އަދި ކޮޓަރީގައި ފޮތްތަކާއި ސްކޫލް ދަބަސްތައް ބަހައްޓާފައި ހުރި ހަރުގަނޑުން ތުނި ފޮތެއް ނަގައިގެން އައިސް ކޮއްކޮގެ މޫނަށް ވިހެން ފެށީމެވެ.
ވާރޭގެ ތުނި ތިކިތައް ފުރާޅު މައްޗަށް ވެހެންފެށުމުން އަހަރެން ހިތަށް އުފާވެރިކަން ލިބިގެން ދިޔައެވެ. ކޮޓަރި ތެރޭގައިވާ ހުނުކަން ކުޑަވެގެން ދާނެތީއެއް ނޫނެވެ. ވާރޭގެ ތިކިތަކުން ފުރާޅުގެ ޓިނުތަކުގައި އުފައްދާ މިޔުޒިކުން އަހަރެންގެ ހިތަށް ފިނިކަން ލިއްބައިދޭތީއެވެ. ވާރޭގެ އަޑު މަޑުމަޑުން ގަދަވަމުންގޮސް، ފަންކާއިން ގޮވަމުންދިޔަ ގަދަ އަޑު ފަނޑުކޮށްލައިފިއެވެ. އަހަރެން ކޮއްކޮ ކައިރިން ތެދުވެގެންގޮސް ގޮދަޑީގައި އޮށޯތީމެވެ. އަދި ލޯމަރާލާ، ވާރޭގެ ހިތަގައިމު އަޑުގެރެތެއަށް ވިސްނުން ދޫކޮށްލީމެވެ. އެވަގުތު ކޮޓަރީގެ ދޮރުގައި މީހަކު މަޑުމަޑުން ޓަކި ޖަހާލިއެވެ. ލޯހުޅުވާލުމަށްފަހު ފާރުގައި ހުރި ގަޑިއަށް އަހަރެން ބަލާލީމެވެ. އޭރު ގަޑިން މެންދަމުން އަނބުރާ އެއްގަޑި ބައިވާން އުޅެނީއެވެ. އަހަރެންގެ ތުންފަތް މައްޗަށް އުފާވެރިކަމުގެ ހިނިތުންވުމެއް ވެރިވިއެވެ. އަދި އަވަސް އަވަހަށް ތެދުވެގެންގޮސް ކޮޓަރީގެ ދޮރު ހުޅުވާލީމެވެ. ދޮރުމަތީގައި ޝަހޫ ދައްތަ ހިނިތުންވެފައި ހުއްޓެވެ.
'ޝޝޫހހ!' ޝަހާދަތް އިނގިލި ތުންފަތުގައި ޖައްސާލާ، އެއްވެސް ވާހަކައެއް ނުދައްކުމަށް ޝަހޫ ދައްތަ އިޝާރާތް ކޮއްލިއެވެ.
އަހަރެން އާނއެކޭ ބުނުމުގެ ގޮތުން ބޯޖަހާލީމެވެ.
ޝަހޫދައްތަ ކޮޓަރި ތެރެއަށް ވަނުމުން އަހަރެން މަޑުމަޑުން ދޮރު ލައްޕާލީމެވެ.
3 comments:
oh, youre the joalifathi guy? I never visit ur blog after ur LOV post on oct 12,2006. btw, nice writing here, keep it up
munchi mee haadha gadha meeha kolhekey dho? :) i love this story already! when's the next part coming? until then..
munchi v salhi ingey. keep it up. looking forward to the next part......
Post a Comment