އަހަންނަށް ހޭލެވުނީ ގޭކައިރި މިސްކިތުން ބަންގިގޮވާ އަޑަށެވެ. އަހަރެން އަވަސް އަވަހަށް ތެދުވީމެވެ. އަދި ކޮޓަރިން ނުކުމެގެން ފާޚާނާއަށް ދިޔައީމެވެ. އޭރު ދޮންބެ ފާޚާނާއިން ނުކުންނަނީއެވެ.
'އަވަސް ކުރޭ!' އަހަރެން ފެނުމުން ދޮންބެ ބުންޏެވެ.
އަހަރެން ޖަވާބެއް ނުދީ ފާޚާނާއަށް ވަނީމެވެ. އަދި އަވަސް އަވަހަށް ވުލޫކޮށްލައިގެން ނުކުތީމެވެ. އޭރު ނަމާދަށް ދާން ތައްޔާރުވެގެން ދޮންބެ ހުއްޓެވެ. އަހަރެން ކުރީދުވަހު ލައިގެން އުޅުނު ފަޓުލޫނާއި ގަމީސް ލައިގެން ދޮންބެއާއެކު ނަމާދަށްދާން ނުކުތީމެވެ.
'ތިނޫން އެއްޗެއް ނެތީތަ ލާނެ؟' އަހަރެން ލައިގެންހުރި ރޫއަރާފައިވާ ގަމީހަށް ބަލާލަމުން ދޮންބެ ބުންޏެވެ.
'އަނެއް ގަމީސް އޮތީ ދާވެފަ." އަހަރެން އިސް ޖަހައިގެން ހުރެ މަޑުމަޑުން ބުނީމެވެ.
'ކޮބާ ދޮންބެ ދިން ގަމީސް؟ އެއީ ދޮންބެ އެންމެ ފަހަރަކު ލާފަ އޮތް ގަމީހެއް.'
'މަންމަ ބުނީމަ ތުއްތުބެއަށް ދިނީ.' ރޭ ވެހުނު ވާރޭގެ ސަބަބުން މަގުމަތީ ހެދިފައިވާ ފެންގަނޑުގެ އެއްކައިރިން، ފެންގަނޑަށް ނޭރި ހިނގަން މަސައްކަތް ކުރަމުން އަހަރެން ބުނީމެވެ. 'މަންމަ ބުނީ މަށަށް މާ ބޮޑޯ އެގަމީސް.'
'ހޫނ!' ފެންގަނޑުގެ އެއްފަރާތުން ފާރުކައިރީގައި ބަހައްޓާފައި ހުރި ގާކޮޅުތައް މަތިން ހިނގަމުން ދޮންބެ ބުންޏެވެ.
އޭރު މާލޭގެ މަގުތަކުގައި އަދި ގާ ނާޅައެވެ. ކިރިޔާވެސް ވާރޭކޮޅެއް ވެހިލައިފިނަމަ މަގުތައް ފެންބޮޑުވެއެވެ.
އަހަރެމެންނަށް މިސްކިތާ ހަމަޔަށް ދެވުނު އިރު ނަމާދުކުރަން ފަށައިފިއެވެ.
ނަމާދުކޮށް ނިމިގެން ގެއަށް އައިސް އެންމެ ފުރަތަމަވެސް އަހަރެން ހޯދީ ޝަހޫދައްތަ ދިން ހަދިޔާއެވެ. ކޮޓަރީގެ ފޮތް ހަރުގަނޑުމަތީ ހަދިޔާ ނެތުމުން، ޝަހޫދައްތަ އެ ޗޮކްލެޓް އައިސް އަލަމާރިއަށް ލީކަން އެނގުނެވެ. ޗޮކަލެޓް ފެނުމާއެކު އަހަރެންގެ ކުޅު ދިޔާވިއެވެ. އަވަސް އަވަހަށް ޗޮކްލެޓް ނަގައިގެން މީހަކަށް ފެނުމުގެ ކުރިން ކޮޓަރިއަށް ވަދެ ކަނޑާލީމެވެ. ޗޮކްލެޓްގައި ދަތްވަޅެއް ޖެހުމާއެކު އަހަރެންގެ ލޯ ފެންކަޅިވެގެން ދިޔައެވެ.
'ކަލޭ ދޯ މަގޭ ޗޮކަލެޓް ކާލީ؟' ކޮޓަރީގެ ދޮރު ހުޅުވާލުމަށްފައު ވައިރޯޅިއެއް ފަދައިން ކޮޓަރިތެރެއަށް ވަދެގެން އައިސް ތުއްތުބެ އެހިއެވެ. ފެންވަރައިގެން ރަނގަޅަށް ފެންވެސް ނުހިއްކާ ތުވާލި އަނދެގެން ހުރުމުގެ ސަބަބުން ތުއްތުބެގެ ގައިން ކޮޓަރި ތެރެއަށް ފެންތައް ފައިބަން ފެށިއެވެ. އަހަރެން ހުރީ ސްކޫލަށް ދާން ތައްޔާރުވެގެންނެވެ. އޭރު ޖާދުﷲ ކޮއްކޮ ޔުނީފޯމް ލަނީއެވެ.
'މަށެއް ނުކަން!' އަހަރެން ފަހަތަށް ޖެހިލުމަށް ފަހު ބުނީމެވެ.
'ދެން ކާކު ކެއީ؟' އަޑަށް ބާރުލާފައި ތުއްތުބެ އެހިއެވެ. 'ކަލޭ ނޫން އެހެން މީހަކު ނުނަގާނެ.' ކޮޓަރީގައި ހުރި ކުޑަ ކުނިވަށިގަނޑަށް ތުއްތުބެ ބަލާލިއެވެ. 'މީ ކޯއްޗެއް؟' އޭގެތެރޭގައި ހުރި ޗޮކްލެޓް ކަރުދާސްކޮޅު ތަކަށް އިޝާރާތް ކޮށްލަމުން ތުއްތުބެ ބުންޏެވެ.
'ތީ ޝަހޫދައްތަ މަށަށް ދިން ޗޮކަލެޓެއް!'
'މަންމާ!' ތުއްތުބެ ވަރަށް ބާރަށް ގޮވާލިއެވެ. އަހަރެންގެ ހިތް ބިރުން ތެޅިގަތެވެ.
'މަށެއް ނުނަގަން.' އާދޭހުގެ ރާގެއްގައި އަހަރެން ބުނީމެވެ. 'އެއީ ޝަހޫދައްތަ ދިން ޗޮކްލެޓެއް!' އަހަރެން ތުރުތުރުއަޅާ އަޑަކުން ތަކުރާރު ކޮށް ބުނީމެވެ.
'މަންމާ!'
'ކިހިނެއްތަ ވަނީ؟' މަންމަގެ އަޑުގައި ވަނީ ހިތްހަމަ ނުޖެހުމުގެ ރާގެވެ.
'މި ފައުޒީ މަގޭ ޗޮކްލެޓް ކާލީ!'
'އެ ތެދެއް؟' ދެބުމަ ގޮށްޖަހާލުމަށް ފަހު ނުރުހުމާއެކު ބަލާލަމުން މަންމަ ބުންޏެވެ.
އަހަރެން ނޫނެކޭ ބުނުމުގެ ގޮތުން ބޯހޫރާލީމެވެ.
'މިއޮތީނު ކާލާފަ!' ޗޮކްލެޓް ކަރުދާސްތައް މަންމައަށް ދައްކާލަމުން ތުއްތުބެ ބުންޏެވެ.
'ކިހާވަރުގަދަ ކަމެއް މިދެން! މިކުއްޖާގަނޑާހެދި މަށަށް ނޯވޭ ނޭވާވެސް ލެވެން.' ވަށިގަނޑަށް ބަލާލަމުން މަންމަ ބުންޏެވެ. އަދި ފިޔަވަޅެއް ކުރިއަށް އެޅުމަށްފަހު އަހަރެންގެ ކަންފަތުގައި ހިފާ އަނބުރާލިއެވެ. 'ކަލޭ ކީއްވެތަ މާ އަތްދިގުވެގެން ތި އުޅެނީ؟'
'އާހހ!' ވީތަދުން އަހަރެންގެ އަނގައިން އަޑެއް ބޭރުވިއެވެ.
'މިހާރު މި ހައިވާނުގެ އަތް ދިގުކަމުން ތަނެއްގަ އެއްޗެއް ބޭއްވޭ ވަރެއްވެސް ނޫނޭ!' އަހަރެންގެ ފޫކޮޅުގައި ބާރު ދެއެތިފަހަރު ޖަހަމުން މަންމަ ބުންޏެވެ. އަހަރެންގެ ލޮލުން ހޯސްލާފައި ކަރުނަތައް ފައިބައިގަތެވެ.
ޖާދުﷲ ކޮއްކޮ ރޯންފެށިއެވެ. ނަމަވެސް މަންމަ އަޅައެއް ނުލައެވެ.
އެވަގުތު ބައްޕަ އައިސް ކޮޓަރިއަށް ވަނެވެ. 'ކިހިނެއްތަ ތިވަނީ؟' މަންމަގެ އަތުގައި ހިފާ ފަހަތަށް ދަމައިގަންނަމުން ބައްޕަ ބުންޏެވެ.
'ކަލޭގެ ލޯބިވާ ދަރި ކުރެން އަހާބަލަ!' މަންމަ ނުރުހުމާއެކު ބުންޏެވެ. 'މަގޭ އަތުން ދޫކޮށްލާ!' އަތް ފޮޅުވާލަމުން މަންމަ ބުންޏެވެ. އަދި ކޮޓަރިން ނުކުމެގެން ދިޔައެވެ.
'ކިހިނެއްވީ މަންމަ އެހާ ރުޅިއައިސްގެން އެ އުޅެނީ؟' އަހަރެން ކުރެން ބައްޕަ އެހިއެވެ.
އަހަންނަށް ޖަވާބެއް ނުދެވުނެވެ. ހައްތާ ބާރަށް ރޮއެގަނެވުނީއެވެ.
ބައްޕަ އަހަރެން ގަޔާ ކައިރި ކޮށްލިއެވެ. އަހަރެން ބައްޕަ ގައިގާ އޮޅުލައިގަތީމެވެ.
'ކިހިނެއްތަ ވީ ސަލާމް؟' ބައްޕަ ތުއްތުބެ ކުރެން އެހިއެވެ. ކަންތައް ހިނގި ގޮތް ތުއްތުބެ ކިޔައިދިނެވެ. އަހަރެން ތުއްތުބެއާ ދެކޮޅު ހެދުމުގެ ގޮތުން އެއްވެސް އެއްޗެކޭ ނުބުނަމެވެ.
'ދެން އަޅާނުލާ! މިއަދު އޮފީހުން އަންނަމުން ޗޮކްލެޓެއް ގެނެސްދޭނަން.' ބައްޕަ ތުއްތުބެ ކައިރީ ބުންޏެވެ. 'ދަރިފުޅުވެސް ބޭނުންތަ ޗޮކަލެޓެއް؟' އަހަރެން ގަޔާ ދުރުކޮށްލުމަށްފަހު މޫނަށް ބަލާލަމުން ބައްޕަ ބުންޏެވެ.
އަހަރެން ދެއަތުން މޫނު ފުހެލުމަށްފަހު ނޫނެކޭ ބުނުމުގެ ގޮތުން ބޯ ހޫރާލީމެވެ.
'އެއްޗެއް ބޭނުން ވެއްޖެއްޔާ ބައްޕަ ކައިރީ ބުނައްޗޭ! އޭރުން ބައްޕަ ހޯދަދެވޭތޯ ބަލާނަން.' ބައްޕަ އޯގާތެރިކަމާއެކު ބުންޏެވެ. 'ދެން އަވަހަށް ހުއަޓާލާ! ހުއްޓާލައިގެން އަވަހަށް ސްކޫލަށް ދާންއުޅޭ! މިހާރު އެއޮއް ގަޑިޖެހެނީ!'
ކޮއްކޮއާއެކު ގެއިން ނުކުމެ ތާޖުއްދީނަށް ދާން އާއްމުކޮށް އަޅާ މަގަށް އެޅިއިރު އެމަގުގައި ވަނީ ބޮޑު ފެންގަނޑު ހެދިފައެވެ. އެހަރެން ބޫޓާއި އިސްތާކީނު ބާލާ ކޮއްކޮ އަތަށް ދިނުމަށްފަހު ކޮއްކޮ އުރާލީމެވެ. އަދި ކޮއްކޮ އުރައިގެން ހުރެ ފެންގަނޑު ހުރަސްކުރަން ފެށީމެވެ. އެވަގުތު ކޮއްކޮ ހޭންފެށިއެވެ. ކޮއްކޮގެ މައުސޫމު ހުނުމުގެ ސަބަބުން އަހަންނަށް އުފާވެރިކަން ލިބުނެވެ. އަހަރެންވެސް ހޭންފެށިމެވެ. ވަކި ސަބަބެއް ނެތިއެވެ.
'ކޮއްކޮ ހާދަ ބަރޭ!' ފެންގަނޑު ހުރަސްކޮށްލުމަށްފަހު ކޮއްކޮ ބިންމައްޗަށް ބޭލުމަށްފަހު އަހަރެން ބުނީމެވެ. އަދި ބޫޓާއި އިސްޓާކީނު އަތުލުމަށްފަހު ކޮއްކޮގެ އަތުގައި ހިފައިގެން ހިނގައިގަތީމެވެ.
ސޮކޫލަށް ދެވުނުއިރު ކްލާސްތައް ފެށިއްޖެއެވެ. ސްކޫލުގެ ގޯތިތެރޭގައިވެސް ވަނީ ފެންގަނޑު ހެދިފައެވެ. ކޮއްކޮ ކްލާހާއި ދިމާއަށް ދުއްވައިގަތުމުން އަހަރެން ބޫޓަށް އަރައިގެން ކްލާހަށް ވަނީމެވެ.
'ކީއްވެ ގަޢި ޖެހުނީ؟' މިސް އެހިއެވެ.
'މިސް ފެންގަނޑު...' އަހަރެން ޖަވާބު ދިނީމެވެ.
އަހަރެންގެ ޖަވާބުން މިސް ކައިރިއަށް ހިނިއަންނަގޮތް ވިއެވެ. 'އަވަހަށް ގޮސް އިށީންދޭ!'
އަހަރެން އިށީންނުމުން، މިސް ބޯޑުގައި ކުރިން ލިޔަމުން ދިޔަ ޖުމްލަތައް ފުރިހަމަ ކުރަންފެށިއެވެ. އަހަރެން ބޭރު ބަލާލީމެވެ. ކްލާހުގައި އިންނާކަށް އަހަރެން ބޭނުމެއް ނޫނެވެ. އަހަރެން ބޭނުންވަނީ ޝަހޫދައްތަ ކައިރިއަށް ދާށެވެ. ޝަހޫދައްތައާއި ސުވާލުކުރާށެވެ. އެ ޗޮކްލެޓަކީ ތުއްތުބެގެ ޗޮކްލެޓެއް ކަމަށްވާނަމަ، ޝަހޫދައްތަ އަހަރެންނަށް ދިން ޗޮކްލެޓް ކޮބާހެއްޔެވެ؟
އަހަރެން މިސްއާ ދިމާއަށް ބަލާލީމެވެ. އޭރުވެސް ބޯޑުގައި ޖުމްލަ ލިޔުމުގައި އަވަދިނެތި މިސް އުޅެއެވެ. އަހަރެން މަޑުމަޑުން ތެދުވީމެވެ. އަދި އެހެން ކުދިންގެ މޫނަށް ބަލާލުމަށްފަހު ނުބުނާށޭ ބުނުމުގެ ގޮތުން އިނގިލި ތުންފަތުގައި ޖައްސާލާ އިޝާރާތްކޮށްލީމެވެ. އަދި ސިއްރުސިއްރުން، މިސްއަށް ނޭންގި ކުލާހުން ބޭރަށް ނުކުތީމެވެ. އެއަށްފަހު، ޝަހޫދައްތައާއި ބައްދަލުކުރަން ދިއުމަށްޓަކައި މިސްރާބު ޖެހީމެވެ.
-ނުނިމޭ-
Pic taken from Phase Drift
2 comments:
hey this is certainly going weelllll....heh...a lil bit of suspense is in order i think..heh..
this part is very much better than the last one.... getting curious ingey... when is the next part commin? by the way ur description is super... is it the influence of Charles Dickens? hehe keep it up!
:) lookin forward to the next part.
Post a Comment